முகப்பு

செய்திகள்

சென்னை: சென்னையில் இந்த ஆண்டு நடக்கும் சர்வதேச திரைப்பட விழாவில் 12 தமிழ்ப் படங்கள் உள்பட 170 படங்கள் திரையிடப்படுகின்றன.

இது திரைப்பட விழா சீஸன். சமீபத்தில்தான் கோவா மற்றும் பெங்களூரில் சர்வதேச திரைப்பட விழாக்கள் நடந்து முடிந்தன.

இப்போது சென்னையில் சர்வதேச திரைப்பட விழா கொண்டாடப்படுகிறது. இந்த விழாவில் தமிழ் மட்டுமின்றி உலகின் பல்வேறு நாடுகளிலும் உள்ள சிறந்த திரைப்படங்கள் திரையிடப்படுகின்றன.

இந்த ஆண்டும் வருகிற டிசம்பர் 18-ந்தேதி 12-வது சென்னை சர்வதேச திரைப்பட விழா சென்னையில் தொடங்குகிறது.

8 நாட்கள் நடைபெறும் இந்த விழாவில் 45 நாடுகளிலிருந்து 170 திரைப்படங்கள் திரையிடுவதற்கு தேர்வாகியுள்ளது. இதில் கேன்ஸ், பெர்லின், வெனிஸ் திரைப்பட விழாக்களில் விருது பெற்ற படங்களும் அடங்கும். இந்த படங்கள் சென்னையில் 8 இடங்களில் திரையிடப்படுகின்றன. உட்லண்ட்ஸ் காம்ப்ளக்ஸ், ஐநாக்ஸ், கேசினோ தியேட்டர், ரஷியன் கலாச்சார மையம் ஆகிய இடங்களில் இப்படங்கள் திரையிடப்பட உள்ளன.

இந்த 170 படங்களில் 12 தமிழ் படங்களும் இடம் பெற்றிருக்கின்றன. அவை என்னதான் பேசுவதோ, மெட்ராஸ், பூவரசம் பீப்பீ, சதுரங்க வேட்டை, வெண்நிலா வீடு, சலீம், முண்டாசுப்பட்டி, கதை திரைக்கதை வசனம் இயக்கம், சிகரம் தொடு, பண்ணையாரும் பத்மினியும், தெகிடி, குற்றம் கடிதல்.