அனிருத்தைச் சேர்த்துக் கொண்டு மீண்டும் கர்ஜிக்க வரும்‘சிங்கம் 3’.. "பெண் சிங்கம்" அனுஷ்கா?

சென்னை: மீண்டும் சூர்யா - ஹரி இருவரும் இணைந்து உருவாக்கும் 'சிங்கம்' படத்தின் மூன்றாம் பாகத்தில் இசை அனிருத் எனக் கூறப்படுகிறது.

அஞ்சான் படத்தைத் தொடர்ந்து தற்போது வெங்கட்பிரபு இயக்கத்தில் 'மாஸ்' படத்தில் நடித்து வருகிறார் சூர்யா. அப்படத்தைத் தொடர்ந்து விக்ரம் குமார் இயக்கும் '24' படத்தில் நடிக்கவிருக்கிறார். விக்ரம் குமார் படத்தை சூர்யாவே தயாரிக்க இருக்கிறார்.

'24' படத்தில் நடித்துக் கொண்டே பாண்டிராஜ் இயக்கும் 'ஹைக்கூ' படத்திலும் சிறிய வேடத்தில் நடிக்க சூர்யா சம்மதித்திருக்கிறார். இப்படங்களைத் தொடர்ந்து ஹரி இயக்கத்தில் சூர்யா நடிப்பார் எனக் கூறப்பட்டது.

ஏற்கனவே சிங்கம், சிங்கம் 2 படங்கள் வெற்றிப்படங்களாக அமைந்ததால், மீண்டும் அக்கூட்டணி சிங்கம் 3ஐ உருவாக்க திட்டமிட்டிருப்பதாக தகவல்கள் வெளியாகின.

இந்நிலையில், தற்போது சூர்யா - ஹரி இணையும் படம் 'சிங்கம் 3' என்பது ஏறக்குறைய உறுதியாகியுள்ளது. மேலும், சிங்கம், சிங்கம் 2 ஆகிய படங்களுக்கு இசையமைத்த தேவி ஸ்ரீபிரசாத் 'சிங்கம் 3' படத்திற்கு இசையமைக்க மாட்டார் என்றும், அவருக்கு பதிலாக அனிருத் இசையமைப்பார் என்றும் கூறப்படுகிறது.

ஆகஸ்ட் மாதத்தில் படம் தொடங்கும் என்று தெரிகிறது. இந்த ஆண்டு கடைசியில், அல்லது தீபாவளிக்கு சிங்கம் 3 வெளியாகலாம் என்றும் எதிர்பார்க்கப்படுகிறது.

முதல் இரண்டு பாகங்களிலும் "பெண் சிங்கமாக" நடித்த அனுஷ்கா தான் இப்படத்திலும் சூர்யாவிற்கு ஜோடியாக நடிப்பாரா இல்லையா என்பதெல்லாம், படத்தின் அதிகாரப்பூர்வ அறிவிப்பின் போது தெரிய வரும்.