குணசேகரனை வாயடைக்க வைத்த ரேணுகா-நந்தினி.. எதிர்நீச்சல் தொடர்கிறது அதிரடி ட்விஸ்ட்!

சென்னை: எதிர்நீச்சல் தொடர்கிறது எபிசோடின் தொடக்கத்தில், குணசேகரன் ராவணனிடம் பிசினஸ் பொறுப்பை ஒப்படைப்பதாகக் கூறுகிறார். இதைக் கேட்டு அதிருப்தி அடையும் நந்தினி மற்றும் ரேணுகா இருவரும், இதில் எங்களுக்குக் கொஞ்சம் கூட விருப்பமில்லை என முகத்திலடித்தாற்போல் சொல்கின்றனர். ஈஸ்வரியும், எப்போது எதற்கு இதையெல்லாம் பேச வேண்டும்? இது தேவையில்லாத வேலை, பிறகு பார்த்துக் கொள்ளலாம் என ராவணனை ஓரங்கட்டுகிறாள். இதனால் பயங்கர ஆத்திரமடைந்த ராவணன், தனது பிஏ லட்சுமணனிடம், அந்தக் குடும்பத்தையும், அதில் இருப்பவர்களையும் ஒவ்வொருவராகத் தனித்தனியாகப் பிரித்து அந்த வம்சத்தையே நிர்மூலமாக்குவேன். அதன் பிறகுதான் குணசேகரன் முன்னாடி போய் நின்னு நான் யார் என்கிற உண்மையைச் சொல்வேன் என்கிறான்.

கதிர், ஞானத்திற்கு அட்வைஸ்: மறுபக்கம், நந்தினியும் ரேணுகாவும் கதிர் மற்றும் ஞானத்தை அழைத்து பேசுகின்றனர். அப்போது, நந்தினி, "யார் இந்த ராவணன்? அவனைப் பார்த்தால் நல்லவன் போல தெரியவில்லை. அவனுக்கு அவ்வளவு சொத்துக்கள் இருக்கும்போது அவன் ஏன் நம்முடைய பிசினஸை கவனிக்கணும்? உங்களுக்கு ஒரு வேலை தெரியும்னா அதை நீங்களே செய்யுங்க, அவன் மூலமா செய்ய எனக்கு விருப்பமில்லை என்கிறாள். அதைத்தொடர்ந்து பேசிய ரேணுகா, ஞானத்திடம், இதற்கு முன் கரிகாலனை நம்பி அந்த கருவாட்டுக்கடை பிசினஸை ஆரம்பிச்சாங்க.. கடைசியில என்ன ஆச்சு? பிசினஸ் ஆரம்பிக்கிறதுங்கிறது லேப்டாப்பை பார்த்து முடிவு பண்ற வேலை இல்லை. முதல்ல அக்கவுண்ட் தொடங்கணும், பெயர் வைக்கணும், ஜிஎஸ்டி எனப் பல வேலைகள் இருக்கு. அதையெல்லாம் விட்டுட்டு ராவணன் லேப்டாப்ல படத்தை போட்டு காட்டுறான், அத நீங்க நம்புறீங்க என வெளுத்து வாங்குகிறாள். அந்த நேரம் அங்கு வரும் ஈஸ்வரியும், இவர்கள் சொல்வதுதான் சரி, யோசித்து முடிவு செய்யுங்கள் என சப்போர்ட் செய்கிறாள்.