பிரம்மாண்டமாக நடந்த போனி கபூர் மகள் திருமணம்.. அண்ணன் அர்ஜுன் கபூர் எமோஷனலாகிட்டாரே!

மும்பை: பாலிவுட் தயாரிப்பாளர் போனி கபூரின் மகள் அன்ஷுலா கபூர், தனது காதலர் ரோஹன் தக்காருடன் ஜூலை 6, 2026 அன்று மும்பையில் நடைபெற்ற நெருக்கமான குடும்ப விழாவில் திருமண பந்தத்தில் இணைந்தார். அன்ஷுலா மற்றும் ரோஹன் இருவரும் ஒரு டேட்டிங் செயலி (dating app) மூலம் சந்தித்து, சில காலம் காதலித்து வந்தனர். கடந்த ஆண்டு நியூயார்க்கில் நடந்த ஒரு அழகான தருணத்தில் ரோஹன், அன்ஷுலாவிடம் தனது காதலைத் தெரிவித்திருந்தார். இவர்களது திருமண கொண்டாட்டங்கள் வார இறுதியில் தொடங்கி, ஒட்டுமொத்த கபூர் குடும்பமும் ஒன்றிணைந்து கொண்டாடிய ஒரு பிரமாண்ட பஞ்சாபி முறைப்படி நடந்து முடிந்தது.

தனது வாழ்வின் முக்கிய நாளுக்காக, பிரபல வடிவமைப்பாளர் தருண் தஹிலியானி வடிவமைத்த பவள நிற பீச் (coral peach) லெஹங்காவை அன்ஷுலா அணிந்திருந்தார். இதில் பாரம்பரிய கைவேலைப்பாடுகள் நிறைந்த மலர் வடிவங்கள் மற்றும் ஜர்தோசி பாணி எம்பிராய்டரி செய்யப்பட்ட பிளவுஸ் இடம்பெற்றிருந்தன. பழங்கால தங்க துப்பட்டா மற்றும் பாரம்பரிய வட இந்திய மணமகள் நகைகளுடன் அவர் தேவதை போல் காட்சியளித்தார். திருமணப் படங்களைப் பகிர்ந்த அன்ஷுலா, "06.07.2026 அத்தனை மனிதர்களில், அத்தனை இடங்களில், அத்தனை தருணங்களில், அது நீ தான். ஒவ்வொரு திருப்பம் மற்றும் ஆச்சரியங்களை கடந்து இப்போதும் நீயே தான் என் உலகமாக இருக்கிறாய்" என்று நெகிழ்ச்சியுடன் பதிவிட்டுள்ளார்.

அன்ஷுலாவிற்கு அர்ஜுன் கபூரின் நெகிழ்ச்சியான வாழ்த்து

மணமக்களுக்குப் பலரும் தங்களது வாழ்த்துகளைத் தெரிவித்து வரும் வேளையில், அன்ஷுலாவின் சகோதரரும் நடிகருமான அர்ஜுன் கபூர் தனது இன்ஸ்டாகிராம் பக்கத்தில் திருமணத்தின் போது எடுக்கப்பட்ட சில நெகிழ்ச்சியான புகைப்படங்களைப் பகிர்ந்துள்ளார். அக்கா-தம்பி பாசத்தை வெளிப்படுத்தும் அந்தப் பதிவில் அர்ஜுன், "எனக்கு நீ எப்போதும் என் குட்டித் தங்கை தான், ஆனால் இப்போது உன்னை நான் வழி அனுப்பி வைக்க வேண்டும்... இன்று ரோஹனுடன் உனது புதிய பயணத்தைத் தொடங்குகிறாய். உனது புன்னகையைக் காண்பதில் எனது இதயம், மனம், ஆன்மா அனைத்தும் அளவற்ற மகிழ்ச்சியடைகிறது. நீ வளர்ந்து, ஒவ்வொரு அடியிலும் நம் அம்மாவின் பிரதிபலிப்பாக மாறுவதைக் கண்டு வியக்கிறேன். அம்மா எப்போதும் உன்னை கவனித்துக் கொண்டு ஆசீர்வதிப்பார். நான் எப்போதும் உனக்காக இங்கே இருப்பேன்" என்று குறிப்பிட்டுள்ளார்.

View this post on Instagram

A post shared by Arjun Kapoor (@arjunkapoor)

முன்னதாக, அன்ஷுலாவின் நிச்சயதார்த்தத்தின் போது தந்தை போனி கபூர் பகிர்ந்த வாழ்த்துச் செய்தியில், "நான் உன்னை முதன்முதலில் கைகளில் ஏந்திய தருணத்திலிருந்தே, நீ ஒரு சிறந்த பெண்ணாக வளர்வாய் என்று எனக்குத் தெரியும். உனது தாய் மோனாவின் தைரியமும், அன்பும் ஒவ்வொரு நாளும் உன்னில் வாழ்கிறது. உனது பாட்டியின் தாராள குணமும் அன்பும் உன்னிடம் அப்படியே பிரதிபலிக்கிறது. நீ காதலுடன் மகிழ்ச்சியாக இருப்பதைப் பார்ப்பது என் வாழ்வின் மிகப்பெரிய மகிழ்ச்சி" என்று உணர்வுப்பூர்வமாக எழுதியிருந்தார்.