மீண்டும் டிரெண்டாகும் BoycottbollywoodForever.. அப்போ அமீர்கான் படம் அவ்வளவு தானா?

அமீர்கான் படத்துக்கு ஆப்பு

பாலிவுட்டில் நிலவி வரும் நெப்போடிஸம், போதைப் பொருள் சர்ச்சை மற்றும் ரீமேக் படங்களால் ரசிகர்கள் ரொம்பவே பாலிவுட் நடிகர்கள் மீது கடுப்பாகி உள்ளனர். தென்னிந்திய படங்கள் பல பாலிவுட்டில் ரீமேக் ஆகி வரும் நிலையில், அமீர்கானின் லால் சிங் சத்தா பிரபல ஹாலிவுட் படமான ஃபாரஸ்ட் கம்ப் படத்தின் அதிகாரப்பூர்வ ரீமேக் என்பது குறிப்பிடத்தக்கது. அமீர்கான் மற்றும் கரீனா கபூர் மீது ஏற்கனவே வெறுப்பில் இருக்கும் பாலிவுட் ரசிகர்கள் லால் சிங் சத்தா படத்தை புறக்கணிப்போம் என தற்போது கோஷம் போட்டு வருகின்றனர்.

டிரெண்டாகும் பாய்காட் பாலிவுட்

விரைவில் பான் இந்திய படமாக வெளியாக உள்ள அமீர்கானின் லால் சிங் சத்தா படத்திற்கு திடீரென பாலிவுட் ரசிகர்களே இப்படியொரு எதிர்ப்பை தெரிவித்து வருகின்றனர். தங்கல் படத்தின் மூலம் பாகுபலி வசூலை முறியடித்த அமீர்கானுக்கே இந்த நிலைமையா என நெட்டிசன்கள் கேள்வி எழுப்பி வருகின்றனர். அதே சமயம் அமீர்கான் ரசிகர்கள் தென்னிந்திய சினிமாவை பாக்ஸ் ஆபிஸில் ஜெயிக்க இந்த படத்துக்கு பாலிவுட் ரசிகர்கள் ஆதரவு தரவேண்டும் என கோரிக்கை வைத்து வருகின்றனர்.

இதுதான் பிரச்சனை

பிகே படத்தில் நடிகர் அமீர் கான் இந்துக் கடவுள்களை அவமதித்தார் என அந்த படத்தின் காட்சிகளை பதிவிட்டே இந்த #BoycottbollywoodForever எனும் ஹாஷ்டேக்கை ரசிகர்கள் டிரெண்ட் செய்து வருகின்றனர். அமீர்கான் மற்றும் கரீனா கபூர் இருவருமே இந்து மதத்தினரை புண்படுத்தியதாகவும், அவர்களது படத்தை புறக்கணிப்போம் என பாலிவுட்டில் மிகப்பெரிய போராட்டமே வெடித்துள்ளது.

சுஷாந்த் மரணத்துக்கு நீதி வேண்டும்

பாலிவுட்டில் நிலவி வரும் நெப்போடிசம் காரணமாகத்தான் சுஷாந்த் சிங் தற்கொலை செய்து கொண்டார் என்றும் அவரது மரணத்துக்கு நீதி கிடைக்கும் வரை பாலிவுட் படங்களை தடை செய்யவும் அதை புறக்கணித்தும் போராடுவோம் என்றும் அவரது ரசிகர்கள் இந்த ஹாஷ்டேக்கை இந்தியளவில் டிரெண்ட் செய்து வருகின்றனர்.

இருவரும் என்ன சொன்னாங்க தெரியுமா

நெப்போடிசம் பற்றிய கேள்விக்கு ரசிகர்களால் நாங்க ஒன்றும் ஸ்டார் ஆகவில்லை. எங்க படத்தை நீங்க வந்து ஒன்றும் பார்க்க வேண்டாம் என கரீனா கபூர் சொன்னதையும், சிவலிங்கத்திற்கு பால் ஊற்றும் காசை குழந்தைகளுக்கு படிக்க கொடுங்க என அமீர்கான் பேசியதையும் போட்டு, இவர்கள் இருவரது படத்தையும் பார்க்க செலவு செய்யும் காசை அவர்கள் சொன்னதை போலவே குழந்தைகளுக்கு படிக்க செலவு செய்யலாம் என போட்டு வெளுத்து வாங்கி வருகின்றனர்.