பவர் நடிகருக்கு சப்போர்ட்டுக்குப் போய்.. ஊரு முழுக்க வாங்கி கட்டிக் கொள்ளும் கோளாறு நடிகர்

சென்னை: கோலிவுட் திரையுலகில் எப்போதுமே தங்களுக்குள் இருக்கும் ஈகோ காரணமாக நடிகர்கள் மோதிக்கொள்வது வழக்கம். ஆனால், தேவையில்லாமல் அடுத்தவர் சண்டையில் மூக்கை நுழைத்து, ஊர் முழுக்க வம்பை விலைக்கு வாங்குவதில் நம்ம ஊர் 'கோளாறு' நடிகருக்கு நிகர் அவரேதான் போல. தற்போது அப்படித்தான் ஒரு பஞ்சாயத்தில் சிக்கி, நெட்டிசன்களிடம் செம்ம மொத்து வாங்கிக் கொண்டிருக்கிறார் அந்த நடிகர்.

சினிமாவில் 'பவர்'ஃபுல்லான பின்னணியுடன், மாஸ் காட்டி வரும் அந்த பவர் நடிகருக்கும், மற்றொரு முன்னணி தயாரிப்பு நிறுவனத்திற்கும் இடையே சமீப காலமாகவே செம்ம கட்டப்பஞ்சாயத்து ஓடிக்கொண்டிருக்கிறது. அட்வான்ஸ் வாங்கிவிட்டு கால்ஷீட் தராமல் இழுத்தடிப்பதாக பவர் நடிகர் மீது அடுக்கடுக்கான புகார்கள் வாசிக்கப்பட்டு வருகின்றன. இதனால் அந்த நடிகரின் இமேஜ் டோட்டலாக டேமேஜ் ஆகி, சமூக வலைத்தளங்களில் பலரும் அவருக்கு எதிராக கருத்து தெரிவித்து வந்தனர்.

பிரச்சனையில் குதித்த கோளாறு நடிகர்!
"ஊர் இரண்டு பட்டால் கூத்தாடிக்கு கொண்டாட்டம்" என்பது போல, இந்த சண்டையில் சம்பந்தமே இல்லாமல் 'கோளாறு' நடிகர் திடீரென என்ட்ரி கொடுத்துள்ளார். பவர் நடிகருக்கு ஆதரவாக வக்காலத்து வாங்கி, எக்ஸ் (ட்விட்டர்) பக்கத்தில் பக்கம் பக்கமாக அறிக்கை ஒன்றை வெளியிட்டுள்ளார்.

அதில், "பவர் நடிகர் எப்போதும் நியாயத்தின் பக்கமே நிற்பவர். தயாரிப்பாளர்கள் தங்களது சுயலாபத்திற்காக அவர் மீது பழி போடுகிறார்கள்" என்று தயாரிப்பு தரப்பை மிகக் கேவலமாக விமர்சித்து, பவர் நடிகரை தூக்கிப் பிடித்துப் பேசியிருந்தார். பவர் நடிகரின் குட்புக்கில் இடம் பிடித்து, அடுத்த படத்தில் ஒரு நல்ல வாய்ப்பை பிடித்துவிடலாம் என்பதுதான் கோளாறு நடிகரின் தந்திரமான கணக்காக இருந்ததாம்.

ஆனால், அவர் நினைத்தது ஒன்று, நடந்தது வேறொன்றாகிப் போனது. கோளாறு நடிகரின் இந்த பதிவைப் பார்த்த நெட்டிசன்கள் மற்றும் சினிமா விமர்சகர்கள், "முதல்ல உன்னோட யோக்கியதை என்னன்னு ஊருக்கே தெரியும். நீங்க வந்து இவருக்கு சப்போர்ட் பண்ணணுமா?" என்று பழைய பஞ்சாங்கத்தை எல்லாம் தோண்டத் தொடங்கிவிட்டனர்.

ஏற்கனவே கோளாறு நடிகர் சொந்த வாழ்க்கையிலும், சினிமா கேரியரிலும் ஏகப்பட்ட குளறுபடிகளைச் செய்து, தயாரிப்பாளர்களை நடுத்தெருவுக்குக் கொண்டு வந்தவர் என்ற கெட்ட பெயர் இவருக்கு உண்டு. "அடுத்தவன் காசில் ஓசியில் பிரியாணி தின்ன ஆசைப்பட்டு, சொந்தக் காசில் சூனியம் வச்சுகிட்ட கதையா இருக்கே" என்று நெட்டிசன்கள் இவரை வச்சு செய்து வருகின்றனர்.