இந்த படத்தை வாங்கினால் தான் அந்த படம்: ஸ்டைல் நடிகரின் 'சூப்பர்' டீல்

சென்னை: பொம்மை படமே இன்னும் வெளிவராத நிலையில் ஸ்டைல் நடிகர் அவசர அவசரமாக புதுப்படத்தில் நடிக்கத் துவங்கியதற்கான காரணம் தற்போது தெரிய வந்துள்ளது.

ஸ்டைல் நடிகரை வைத்து அவரது இளைய மகள் எடுத்த பொம்மை படம் இந்தா அந்தா என்று ஒருவழியாக வெள்ளிக்கிழமை ரிலீஸாகிறது. அந்த படம் ரிலீஸாவதில் சிக்கல் இருந்தபோதே நடிகர் தனது அடுத்த பட வேலையை அவசர அவசரமாக துவங்கினார்.

படத்தின் வேலைகள் சத்தமில்லாமல் துவங்கியது. புதுமுக ஹீரோக்கள் நடிக்கும் படத்தின் துவக்க விழா கூட பிரமாண்டமாக நடக்கையில் பிரமாண்டத்திற்கு பெயர் போன ஸ்டைல் நடிகரின் பட துவக்க விழா கமுக்கமாக நடந்தது அனைவரையும் ஆச்சரியப்பட வைத்தது.

இந்நிலையில் பொம்மை படத்தின் சரிவை சரிகட்டத் தான் நடிகர் அடுத்த பட வேலைகளை அவ்வளவு அவசரமாக துவங்கினார் என்று கூறப்படுகிறது. மேலும் பொம்மை படத்தை வாங்குபவர்களுக்கு மட்டுமே ஸ்டைல் நடிகர் தற்போது நடிக்கும் படம் கொடுக்கப்படும் என்று கூறுகிறார்களாம்.

முன்னதாக ஸ்டைல் நடிகர் இந்த மாத துவக்கத்தில் ட்விட்டரில் சேர்ந்தது கூட பொம்மை படத்தை விளம்பரப்படுத்த தான் என்று சமூகவலைதளங்களில் பேசப்பட்டது என்பது குறிப்பிடத்தக்கது.