ஆர்யாவை இயக்கும் 'எங்கேயும் எப்போதும்' சரவணன்!

குரு ஏ ஆர் முருகதாஸ் பெரிய பட்ஜெட், பெரிய ஆர்டிஸ்ட், பெரிய லாபம் என்று போனாலும், சின்ன பட்ஜெட் - பெரிய வெற்றி என்பது அவரது சிஷ்யரான சரவணனின் பாணி. அதற்கு சாட்சி, சமீபத்தில் வெளியாகி வெற்றி பெற்ற அவரது முதல் படம் 'எங்கேயும் எப்போதும்'.

இந்தப் படத்துக்குப் பிறகு ஏராளமான வாய்ப்புகள் வந்தாலும், நிதானமாக ஒரு படத்தை மட்டும் இயக்க ஒப்புக் கொண்டுள்ளார் சரவணன்.

இந்தப் படத்தில் ஆர்யா நடிக்கிறார். சரவணன் சொன்ன ஒன்லைனைக் கேட்டு ஈர்ப்பாகிப் போன ஆர்யா, லிங்குசாமி இயக்கத்தில் வேட்டை படம் முடிந்த பிறகு, இந்தப் படத்தில்தான் நடிக்க விரும்புவதாகக் கூறி கால்ஷீட்டும் கொடுத்துள்ளார்.

இந்தப் புதிய படத்தையும் லிங்குசாமியின் திருப்பதி பிரதர்ஸ் பட நிறுவனமே தயாரிக்கப் போகிறது.

டிசம்பரில் தொடங்கும் என எதிர்ப்பார்க்கப்படும் இந்தப் படத்தின் மற்ற விபரங்கள் விரைவில் வெளியாகும் என அறிவிக்கப்பட்டுள்ளது.