சஞ்சிதா ஷெட்டியின் மனதைக் கொள்ளையடிக்கும் விதார்த்!

கொள்ளைக்காரன்.... - மைனா, முதல் இடம் படங்களுக்குப் பிறகு விதார்த் நடிக்கும் புதிய படம் இது.

தலைப்பே சொல்லிவிடும் படம் எப்படியென்பதை. இந்தப் படத்தில் சின்னச்சின்ன ஜாலி திருட்டுகள் செய்யும் இளைஞனாக வரும் விதார்த்தின் வாழ்க்கையை, ஒரு கட்டத்தில் தலைகீழாகப் புரட்டிப் போடுகிறதாம் ஒரு திருப்பம்.

இந்தப் படத்தை தமிழ்ச் செல்வன் கதை வசனம் எழுதி இயக்குகிறார்.

படத்தில் விதார்த்துக்கு ஜோடி சஞ்சிதா ஷெட்டி. சின்னச் சின்னதாய் திருட்டுகள் செய்த விதார்த், ஒரு நாள் பெரிதாகக் கொள்ளையடிக்கிறார் சஞ்சிதாவின் மனதை. அதைத் தொடர்ந்து வரும் காட்சிகள் ரசிகர்களின் உள்ளங்களை கொள்ளையடிக்கும் விதத்தில் உருவாக்கப்பட்டுள்ளன, என்கிறார் இயக்குநர் தமிழ்ச்செல்வன்.

பிரசாத் சினி ஆர்ட்ஸ் பேனரில் தயாராகும் இந்தப் படத்துக்கு ஜோகன் இசையமைத்துள்ளார்.