'அப்பா' ஆகிறார் கார்த்திக்!

By Staff

| Published: Tuesday, January 27, 2009, 18:59 [IST]

தமிழ் சினிமாவில் இது முன்னாள் முன்னணி ஹீரோக்கள், தந்தை கேரக்டர்களுக்கு மாறும் காலம் போலும். சத்யராஜ், பிரபுவைத் தொடர்ந்து இப்போது கார்த்திக்கும் அப்பா வேடம் பூணுகிறார்.

ரொம்ப காலமாக ஹீரோக்களாக கலக்கி வந்த பல நாயகர்கள் அடுத்தடுத்து அப்பா கேரக்டர்களுக்கு தாவி வருகிறார்கள். சத்யராஜ், தனது மகன் சிபி ராஜின் தந்தையாக நடித்தார். சமீபத்தில் பிரபுவும் அப்பா வேடத்தில் அஆஇஈ படத்தில் அசத்தினார்.

இந்த நிலையில், அடுத்து முன்னாள் கனவுக் கண்ணன் கார்த்திக்கும் அப்பா வேடத்துக்கு வருகிறார்.

ஜெயம் ரவி புதிதாக நடிக்கவுள்ள படத்தில் அவருடைய அப்பாவாக நடிக்கவுள்ளாராம் கார்த்திக். இப்படத்துக்கு இன்னும் பெயரிடப்படவில்லை. தந்தை கேரக்டராக இருந்தாலும் கூட, கார்த்திக்கின் நடிப்புத் திறமை, ஸ்டைலுக்கேற்ற கேரக்டராக இது இருக்குமாம்.

இப்படத்தை பூபதி பாண்டியன் இயக்கவுள்ளார். ஸ்டுடியோ கிரீன் ஞானவேல் தயாரிக்கவுள்ளார்.

இப்படத்தைத் தொடர்ந்து, முக்கியத்துவம் இருந்தால் அப்பா கேரக்டர்களில் தொடர்ந்து நடிப்பாராம் கார்த்திக்.

ஏற்கனவே சிவலிங்கம் ஐபிஎஸ் என்ற படத்தில் சத்யராஜுக்கு வில்லனாக நடித்துள்ளார் கார்த்திக். ஆனால் இந்தப் படம் இன்னும் பெட்டியை விட்டு வெளிவராமல் சுருண்டு கிடக்கிறது என்பது குறிப்பிடத்தக்கது.