'இப்பல்லாம் யார் சிடி வாங்கறாங்க'... கமல் கணிப்பு எப்போதும் தவறுவதே இல்லை!

எல்பி ரிக்கார்டுகள் வந்த காலத்தில் இப்போது நடப்பது போல இசை வெளியீட்டு விழாக்கள் நடந்ததாக நினைவில்லை. கேசட்டுகள் வழக்கத்துக்கு வந்த பிறகு, ஆடியோ வெளியீட்டு விழாக்கள் என்றால், ஒரு அட்டையில் படத்தின் கேசட்டுகளை ஒட்டி வைத்துக் கொண்டு வந்து வெளியிடுவார்கள்.

பின்னர் கேசட்டுகள் அடியோடு வழக்கொழிந்தன. ரிக்கார்டுகள் கூட இன்றும் பலரிடம் உபயோகத்தில் உள்ளன. ஆனால் 2005 வரை உபயோகத்திலிருந்த டேப் ரிக்கார்டர்கள் - கேசட்டுகள் போயே போச்!

இப்போது சிடிக்களும் அதன் விளிம்பு காலத்தில் நிற்கின்றன. பாடல்களைப் பதிவிறக்கம் செய்ய பென் ட்ரைவ், மைக்ரோ சிப்கள் வந்துவிட்டன.

வழக்கமாக ஆடியோ விழாக்களில் அட்டையால் செய்யப்பட்ட சிடி கட் அவுட்டைத் தூக்கிக் கொண்டு வருவார்கள். அதை ஒரு விஐபி வெளியிட, இன்னொரு விஐபி பெற்றுக் கொள்வார்.

இனி அந்த முறையும் இருக்காது என்றுதான் தெரிறது.

சினிமா தொழில்நுட்பத்தில் மற்ற எல்லாரையும் விட ஒரு பத்தாண்டுகளாவது அட்வான்ஸாக இருப்பவர் கமல். டிவியால் சினிமா அழிந்துவிடும் என்று சொல்லிக் கொண்டிருந்தபோது, "அதெல்லாம் கிடையாது. விஞ்ஞான வளர்ச்சியைத் தடுக்க முடியாது. எனவே டிவியை சினிமாவுக்கு சாதகமாக பயன்படுத்திக் கொள்ளப் பாருங்கள்" என்று கூறியவர் அவர்.

அப்படித்தான் சினிமா வெளியீட்டு முறையிலும் இனி விநியோகஸ்தர்கள், தியேட்டர்காரர்கள் என்று நம்பிக் கொண்டிருந்தால் சினிமா அழிந்துவிடும். டிடிஎச், டிவிக்களில் வீடுகளுக்கே நேரடியாக கொண்டு செல்வதுதான் சிறந்த முறை என அறிவித்து, அதைச் செயல்படுத்தத் துணிந்தார். அதில் அவரது தடுமாற்றம் சற்றே கேலிக்குள்ளானது உண்மைதான். ஆனால் சரியான சந்தர்ப்பம் அமையாததால், அடுத்த வாய்ப்புக்குக் காத்திருக்கிறார்.

இப்போது, இசை வெளியீட்டு முறையில் ஒரு புதுமையைப் புகுத்தியிருக்கிறார் கமல்.

இசை வெளியீட்டு விழாவில் பாடல்களை சிடியில் வெளியிடாமல், இணையம் மூலம் டவுன்லோட் செய்து பாடல்களை வெளியிடும் முறையை தனது உத்தம வில்லன் படம் மூலம் ஆரம்பித்துள்ளார் (இதற்கு முன்பும் சிலர் பென் ட்ரைவ் மூலம் பாடல் வெளியிட்டது நினைவிருக்கிறது. ஆனால் அதையே கமல் செய்யும்போது கூடுதல் கவனம் கிடைக்கிறதல்லவா!).

நேற்று நடந்த உத்தமவில்லன் இசை வெளியீட்டு வேளையில் வழக்கம் போல சிடி வடிவ கட் அவுட் வர, "அட அது எதுக்கு? இப்போதெல்லாம் சிடி எங்கே வாங்குகிறார்கள், எல்லாம் டவுன்லோட்தானே, இதோ பெரிய ஸ்க்ரீனில்.." என்றவுடன், அப்லோட் பட்டனை கமல் தட்ட லோட் ஆனது.

உடனே லிங்குசாமி 'அதெல்லாம் இருக்கட்டும்.. இசையை வெளியிட யாரெனும் பெற்றுக்கொள்ள வேண்டுமே,' என கேட்க கமல், 'பொறுங்கள்.. அதுதானே வேணும்.. அதையும் செய்துவிடுவோம்," என்று கூறி தன் மொபைலில் போன் செய்தார்.

மறுமுனையில் அவர் மகள் ஸ்ருதி. அவருக்கு அந்த அப்லோட் லிங்கை அனுப்பி, பாடலைப் பதிவிறக்கம் செய்து கொள்ளச் சொன்னார். அவரும் செய்து கொள்ள, உத்தம வில்லன் பட ஆல்பத்தின் முதல் இ-பிரதி வெளியாகிவிட்டது.

அரங்கம் கைத்தட்டலில் அதிர்ந்தது!