GOAT ஃபர்ஸ்ட் சிங்கிள் வருமா வராதா?.. வெங்கட் பிரபு என்ன டக்குனு இப்படி சொல்லிட்டாரு

சென்னை: நடிகர் விஜய் கடைசியாக லியோ படத்தில் நடித்திருந்தார். அந்தப் படம் சுமாரான வரவேற்பை பெற்றது. முக்கியமாக விமர்சன ரீதியாக பெருத்த அடி வாங்கியது. இந்தச் சூழலில் அவர் வெங்கட் பிரபு இயக்கத்தில் GOAT படத்தில் நடித்துவருகிறார். பவதாரிணி உயிரிழந்ததால் படத்தின் ஷூட்டிங் தடைப்பட்டிருந்தது. தற்போது மீண்டும் படத்தின் ஷூட்டிங் தொடங்கி மும்முரமாக நடந்துவருகிறது.

வெங்கட் பிரபு கடைசியாக கஸ்டடி படத்தை இயக்கினார். அந்தப் படம் சரியாக போகவில்லை. ஆனால் அந்தப் படம் ரிலீஸ் ஆவதற்கு முன்னதாகவே விஜய்யிடம் கதை சொல்லி ஓகே வாங்கியிருந்திருந்திக்கிறார் அவர். எனவே லியோ படத்தில் விஜய் நடித்துக்கொண்டிருந்தபோதே விஜய்யும், வெங்கட் பிரபுவும் இணையவிருக்கிறார்கள் என அட்டகாசமான அறிவிப்பு வெளியானது. அஜித்துக்கு எப்படி ஒரு மெகா ஹிட்டை வெங்கட் கொடுத்தாரோ அதேபோல் விஜய்க்கும் தரமான சம்பவத்தை செய்வார் என்று ரசிகர்கள் ஆவலோடு எதிர்பார்த்திருக்கின்றனர்.

GOAT: இந்தப் படத்துக்கு GOAT என்று பெயர் வைக்கப்பட்டுள்ளது. சமீப காலமாக அதிகம் புழக்கத்தில் இருக்கும் GOAT வார்த்தையை படத்தின் பெயராக வைத்தது ரொம்பவே புதுமையாக இருப்பதாகவும் ரசிகர்கள் மகிழ்ச்சி தெரிவித்தனர். சென்னை பிரசாத் ஸ்டூடியோவில் பூஜையுடன் ஷூட்டிங் தொடங்கி முதலில் பாடல் காட்சி படமாக்கப்பட்டது. அதனையடுத்து தாய்லாந்து, துருக்கி, சென்னை உள்ளிட்ட இடங்களில் படத்தின் ஷூட்டிங் விறுவிறுப்பாக நடந்தது.

போஸ்டர்கள்: ஆங்கில புத்தாண்டு மற்றும் பொங்கல் பண்டிகையை முன்னிட்டு GOAT படத்திலிருந்து போஸ்டர்கள் வெளியாகி வரவேற்பை பெற்றன. அந்தப் போஸ்டர்களில் விஜய் படு யங்காக இருந்தார். மேலும் இதில் விஜய் டபுள் ஆக்‌ஷன் என்றும் அப்பா கேரக்டர் மற்றும் மகன் கேரக்டரை செய்கிறார் என்றும் தெரிகிறது. அப்பா விஜய்க்கு நடக்கும் துரோகத்தை டைம் ட்ராவலில் சென்று முறியடிப்பதுதான் படத்துடைய ஒன்லைன் என்று கூறப்படுகிறது. மேலும் இதில் அப்பா விஜய் கமாண்டோ ரோல் செய்திருக்கலாம் என்று போஸ்டரை பார்க்கும்போது தெரிகிறது.

நிறுத்தப்பட்ட ஷூட்டிங்: படத்தின் ஷூட்டிங் மும்முரமாக நடந்தது. பக்ரீத் பண்டிகைக்கு படத்தை ரிலீஸ் செய்வதற்கு வெங்கட் பிரபு திட்டமிட்டு அசுரத்தனமாக உழைத்து வருவதாக கூறப்பட்டது. அடுத்தக்கட்ட ஷூட்டிங்கை இலங்கையில் நடத்த அவர் திட்டமிட்டிருந்ததாகவும் கூறப்பட்டது. இப்படிப்பட்ட சூழலில் இளையராஜாவின் மகளும், வெங்கட் பிரபுவின் சகோதரியுமான பவதாரிணி பித்தப்பை புற்றுநோய் காரணமாக உயிரிழந்தார். இதனால் GOAT படத்தின் ஷூட்டிங் நிறுத்தி வைக்கப்பட்டிருந்தது. அதனையடுத்து மீண்டும் தொடங்கி நடைபெற்றுவருகிறது.

கண்டிஷன் போட்ட விஜய்?: படத்தின் க்ளைமேக்ஸ் காட்சியை இலங்கையில் ஷூட் செய்ய வெங்கட் பிரபு திட்டமிட்டிருந்ததாகவும்; ஆனால் இலங்கைக்கு சென்றால் தன்னுடைய அரசியல் எதிர்காலத்துக்கு பங்கம் வந்துவிடுமோ என்று அஞ்சி விஜய் அதற்கு நோ சொல்லிவிட்டதாகவும் கூறப்படுகிறது. இதற்கிடையே GOAT படத்தின் ஃபர்ஸ்ட் சிங்கிள் குறித்து கடந்த சில நாட்களாகவே பேச்சுக்கள் அடிபட தொடங்கின. எனவே விரைவில் முதல் பாடல் வெளியாகலாம் என்று எதிர்பார்க்கப்பட்டது.

வெங்கட் பிரபுவின் பதில்: மேலும் அந்தப் பாடலை விஜய்யும், இளையராஜாவும்தான் இணைந்து பாடியிருக்கிறார்கள் என்றும் ஒரு தகவல் ஓடியது. இந்நிலையில் படத்தின் முதல் பாடல் எப்போது ரிலீஸாகும் என்பது குறித்து வெங்கட் பிரபு தெரிவித்திருக்கிறார். எக்ஸ் பக்கத்தில் ரசிகர் ஒருவர் வெங்கட் பிரபுவை Tag செய்து, GOAT படத்தின் ஃபர்ஸ்ட் சிங்கிளை சீக்கிரம் வெளியிடுங்கள் என்று கேட்டிருந்தார். அதற்கு பதிலளித்த வெங்கட் பிரபு, 'இவ்வளவு சீக்கிரமாவா?.. அதுக்கு இன்னும் நாள் இருக்கு' என்று கூறினார். இதனால் இன்னும் சில வாரங்களில் GOAT படத்தின் ஃபர்ஸ்ட் சிங்கிள் வெளியாகும் என்று பரவிய தகவல் வதந்தி என்பது உறுதியாகியிருக்கிறது.