தோள் பட்டையில் வலி... பிரபல நடிகருக்கு 4 மணி நேரம் நடைபெற்ற அறுவை சிகிச்சை.. சோகத்தில் ரசிகர்கள்!

கால் தூசுக்கு சமம்

சமீபத்தில் தெலுங்கு டிவி சேனல் ஒன்றுக்கு பேட்டியளித்த நடிகர் நண்டமுரி பாலகிருஷ்ணா, ஆஸ்கர் விருது வென்ற ஏஆர் ரஹ்மான் யார் என்றே தனக்கு தெரியாது என்று கூறி சர்ச்சையை கிளப்பினார். மேலும் இந்த விருதெல்லாம் என் கால் தூசுக்கு சமம் என்றும் கூறி பரபரப்பை கிளப்பினார்.

'அகண்டா' படம்

இதனால் சமூக வலைதளங்களில் பெரும் விமர்சனத்துக்கு ஆளான நடிகர் நண்டமுரி பாலகிருஷ்ணா கடுமையாக ட்ரோல் செய்யப்பட்டார். தற்போதும் சினிமாவில் பிஸியாக உள்ள நடிகர் நண்டமுரி பாலகிருஷ்ணா, போயபதி சீனு இயக்கத்தில் உருவாகி வரும் 'அகண்டா' படத்தில் நடித்து வருகிறார்.

மருத்துவமனையில் அனுமதி

இதனை தொடர்ந்து கோபிசந்த் மாலினேனி இயக்கவுள்ள ஒரு படத்திலும் கமிட்டாகியுள்ளார் நடிகர் நண்டமுரி பாலகிருஷ்ணா. இந்நிலையில் நடிகர் நண்டமுரி பாலகிருஷ்ணா ஹைதராபாத்தில் உள்ள ஒரு தனியார் மருத்துவமனையில் நேற்று முன் தினம் அனுமதிக்கப்பட்டார்.

அறுவை சிகிச்சை

கடந்த ஆறு மாதகாலமாக பாலகிருஷ்ணாவுக்கு தோள்பட்டையில் வலி இருந்ததாக கூறப்படுகிறது. இந்நிலையில் சமீப நாட்களாக வலி அதிகரித்ததால் அவர் மருத்துவமனையில் அனுமதிக்கப்பட்டுள்ளார். அவருக்கு எம்ஆர்ஐ ஸ்கேன் செய்யப்பட்டு தோள்பட்டையில் அறுவை சிகிச்சை மேற்கொள்ளப்பட்டது.

4 மணிநேரம் அறுவை சிகிச்சை

இடது தோள்பட்டையில் சுமார் நான்கு மணி நேரம் இந்த அறுவை சிகிச்சை மேற்கொள்ளப்பட்டது. அறுவை சிகிச்சைக்குப் பிறகு பாலகிருஷ்ணா நலமுடன் இருப்பதாகவும், விரைவில் அவர் வீடு திரும்புவார் என்றும் மருத்துவமனை நிர்வாகம் தெரிவித்துள்ளது. பாலகிருஷ்ணாவுக்கு அறுவை சிகிச்சை செய்யப்பட்ட தகவலை அறிந்த ரசிகர்கள் அவர் விரைவில் நலம் பெற வேண்டும் என பிரார்த்தனை செய்து வருகின்றனர்.