எஸ் 3 ரிலீஸ் தள்ளிப் போனதற்கு டப்பு லேதண்டி, குடும்பம் காரணமாம்!

ஹைதராபாத்: எஸ் 3 படத்தின் ரிலீஸ் தேதியை தள்ளிப் போட்டதற்கான காரணத்தை தெரிவித்துள்ளார் நடிகர் சூர்யா.

ஹரி இயக்கத்தில் சூர்யா, அனுஷ்கா, ஸ்ருதி ஹாஸன் நடித்துள்ள எஸ் 3 படம் நவம்பரில் ரிலீஸாகும் என்று கூறினார்கள். பின்னர் டிசம்பர் 16ம் தேதி ரிலீஸாகும் என்று தெரிவிக்கப்பட்டது.

இந்நிலையில் ரிலீஸ் தேதி டிசம்பர் 23ம் தேதிக்கு தள்ளி வைக்கப்பட்டுள்ளது. மோடியின் அதிரடி நடவடிக்கையால் மக்கள் கையில் பணம் இல்லாமல் திண்டாடுவதால் எஸ் 3 ரிலீஸ் தேதி தள்ளிப் போயிருக்கும் என்று பேசப்பட்டது.

படத்தின் தெலுங்கு பதிப்பான எஸ் 3 யமுடுவின் செய்தியாளர் சந்திப்பு ஹைதராபாத்தில் இன்று நடந்தது. அதில் கலந்து கொண்ட சூர்யா கூறுகையில்,

ராம் சரணின் த்ருவா படம் எங்கள் குடும்ப படம் போன்று. அந்த படத்தின் ரிலீஸுக்காக தான் எஸ் 3 படத்தின் ரிலீஸ் தேதியில் மாற்றம் செய்யப்பட்டது. ராம் சரணுக்கு இது முக்கியமான படம். அவருக்கு என் வாழ்த்துக்கள் என்றார்.

ஜெயம் ரவி நடித்த தனி ஒருவன் படத்தின் தெலுங்கு ரீமேக்கே த்ருவா என்பது குறிப்பிடத்தக்கது. த்ருவா வரும் 9ம் தேதி ரிலீஸாகிறது.