முருகதாஸ் படத்தில் விஜய்யின் ஜோடி சமந்தா!

சென்னை: விஜய்யை வைத்து ஏ ஆர் முருகதாஸ் இயக்கும் புதிய படத்தில் விஜய் ஜோடியாக சமந்தா நடிப்பார் என முதல்கட்ட செய்திகள் தெரிவிக்கின்றன.

விஜய்-ஏ.ஆர்.முருகதாஸ் இருவரும் இணைந்த முதல் படம் துப்பாக்கி. அந்தப் படத்தின் வெற்றியைத் தொடர்ந்து இருவரும் மீண்டும் இணைகின்றனர்.

இதனை விஜய்யும் உறுதி செய்துள்ளார்.

இந்த நிலையில் இந்தப் படத்துக்கு அதிரடி என தலைப்பு வைத்திருப்பதாக தகவல் பரவியது.

ஆனால் அதை இயக்குநர் முருகதாஸ் மறுத்துவிட்டார். படத்திற்கு இன்னும் தலைப்பு வைக்கப்படவில்லை.

அதேநேரம் கதாநாயகியாக சமந்தாவை ஒப்பந்தம் செய்துள்ளனர். 'கொலவெறி' புகழ் அனிருத் இசையமைக்கிறார். ஜார்ஜ் சி.வில்லியம்ஸ் ஒளிப்பதிவை கவனிக்கிறார். இவர் முருகதாஸ் தயாரிப்பில் ஆர்யா, நயன்தாரா நடிப்பில் உருவாகியிருக்கும் 'ராஜாராணி' படத்திற்கு ஒளிப்பதிவு செய்தவர் என்பது குறிப்பிடத்தக்கது.

பெரிய ஹீரோவுக்கு ஜோடியாக தமிழில் இப்போதுதான் முதல்முறையாக ஒப்பந்தமாகியுள்ளார் சமந்தா. கடந்த ஆண்டு அவர் ஒப்பந்தமான பெரிய படங்களிலிருந்து திடீரென விலகியது நினைவிருக்கலாம்.