'டேட்ஸ்' வீணாகுதே... கவலையில் சோனாக்ஷி!

கமலுக்கு ஜோடி என்ற அறிவிப்பு வந்த கையோடு சோனாக்ஷி சின்ஹாவிடம் கால்ஷீட் வாங்கிவிட்டார்கள் போலிருக்கிறது விஸ்வரூபம் குழுவினர்.

ஆனால் அதன்பிறகு கிட்டத்தட்ட அந்தப் படக்குழு மறந்தேபோய்விட்டது சோனாக்ஷியை.

மே மாதத்திலிருந்தே அவர் தனது தேதிகளை கமல் படத்துக்கு ஒதுக்கிக் கொடுத்துவிட்டார். ஆனால், இங்கோ, கமல் - செல்வராகவன் லடாய் முற்றி, இயக்குநரே மாறிப் போக, படப்பிடிப்புத் தேதி தள்ளிப் போய்விட்டது.

ஜூன் 5-ம் தேதி லண்டன் போகிறோம் என அவருக்கு தகவல் அனுப்புள்ளனர் கமல் தரப்பிலிருந்து. ஆனால் இன்று வரை பயணம் பற்றி நேரடியாக ஒருவரும் சொல்லவில்லையாம்.

இதில் ரொம்பவே நொந்துபோன சோனாக்ஷி, "ஒரு இந்திப்படத்துக்காக தரவிருந்த கால்ஷீட்டை அப்படியே தூக்கி கமலுக்கு கொடுத்தேன். குறைந்த பட்சம் எனக்கு எல்லா விஷயத்தையும் ஒரு தகவலாகவாவது சொல்லியிருக்கலாம். நான் கொடுத்த தேதிகளில் கிட்டத்தட்ட 1 மாதத்தை வீணடித்துவிட்டார்கள். என்ன செய்வதென்றே புரியவில்லையே..", என்று புலம்ப ஆரம்பித்துவிட்டாராம்.

கமல் படமாச்சே... பொறுமை பெருமை தரும் என்று தேற்றிக் கொள்ள வேண்டியதுதான்!