பாலிவுட்டில் சினேகா... நஸ்ருதீன் ஷா ஜோடியாக நடிக்கிறார்!

தமிழ் சினிமாவின் எவர் கிரீன் ஹீரோயினாக வலம் வரும் 'புன்னகை இளவரசி' சினேகா, பாலிவுட்டில் நடிக்கிறார்.

எடுத்த எடுப்பிலேயே அவர் ஜோடி சேர்ந்திருப்பது, இந்தியாவின் மிகச் சிறந்த நடிகர்களுள் ஒருவர் எனப்படும் நஸ்ருதீன் ஷாவுக்கு ஜோடியாக. படத்தின் பெயர் மேட் டாட்!

இந்தப் படத்தில் நடிப்பதை சினேகாவும் உறுதிப்படுத்தியுள்ளார். "என்னுடைய நெடுநாள் கனவு நிறைவேறியது என்றுதான் சொல்ல வேண்டும். அதுவும் நஸ்ருதீன் ஷா போன்ற ஒரு கலைஞருடன் நடிப்பது வாழ்க்கையில் மறக்க முடியாத அனுபவமாக அமையும்.

பாலிவுட் போனாலும், இஷ்க் க்யா படத்தில் வரும் வித்யா பாலன் போல, எப்போதும் நடிப்புக்கு வாய்ப்புள்ள வேடங்களில்தான் நடிப்பேன். எந்த மொழிக்குப் போனாலும் எனக்கென்று உள்ள தனித்தன்மையை இழக்கமாட்டேன்," என்றார்.

இந்தப் படத்தை இயக்குபவர் ரேவதி வர்மா. தமிழில் ஜூன் ஆர் எனும் படத்தை இவர் இயக்கியுள்ளது நினைவிருக்கலாம்.