நடிகை நந்தனாவுக்கு திருமணம்.. மாப்பிள்ளை வழக்கம்போல 'சாஃப்ட்வேர் எஞ்ஜினியர்'!

சென்னை: நடிகை நந்தனாவுக்கு அடுத்த மாதம் திருமணம் நிச்சயிக்கப்பட்டுள்ளது. கணிப்பொறியாளரை அவர் மணக்கவிருக்கிறார்.

'கிருஷ்ணவேணி பஞ்சாலை, உயிருக்கு உயிராக ஆகிய படங்களில் கதாநாயகியாக நடித்தவர், நந்தனா. இந்த படங்களுக்குப்பின், இவர் புதிய படங்களில் நடிக்காமல், ஒதுங்கியிருந்தார்.

இப்போது அவருக்கு திருமணம் நிச்சயிக்கப்பட்டுள்ளது. மணமகன் பெயர், ஹரி. திருவனந்தபுரத்தைச் சேர்ந்தவர். கணிப்பொறியாளராக பணிபுரிந்து வருகிறார்.

நந்தனா-ஹரி திருமணம் அடுத்த மாதம் (செப்டம்பர்) 6-ந் தேதி, திருவனந்தபுரத்தில் வைதீக முறைப்படி நடக்கிறது.இது, காதல் திருமணம் அல்ல. பெற்றோர்களால் ஏற்பாடு செய்யப்பட்ட திருமணம்.

திருமணம் குறித்து நந்தனா கூறுகையில், "கடந்த ஒரு வருடமாக எனக்கு என் பெற்றோர்கள் மாப்பிள்ளை தேடி வந்தார்கள். நல்ல வரன் வந்தது. எனக்கும், என் பெற்றோர்களுக்கும் பிடித்து இருந்தது.நடித்தது போதும் என்று நிறுத்திக் கொண்டேன். திருமணத்துக்குப்பிறகும் நான் நடிக்கப் போவதில்லை,'' என்றார்.