உக்ரைனில் சிக்கிக்கொண்ட நடிகை… ப்ளீஸ்… பொய்யான செய்திகளை பரப்பாதீர்கள்!

உக்ரைன்

உக்ரைன் மீதான ரஷ்யாவின் போர்த் தாக்குதல் நான்காவது நாளாக இன்றும் தொடர்ந்து கொண்டிருக்கிறது. உக்ரைன் தலைநகர் கீவை கைப்பற்ற தீவிரம் காட்டி வரும் ரஷ்யப் படைகள், ரஷ்ய அரசின் உத்தரவின் பேரில் உக்ரைனை எல்லா திசைகளிலிருந்தும் தாக்க இருப்பதாகக் கூறப்படுகிறது.

பதற்றத்தில் உக்ரைன்

உக்ரைனில் நிலவும் அசாதாரண சூழல் காரணமாக, அந்நாட்டு மக்கள் உயிர் பயத்தில் அண்டை நாடுகளில் தஞ்சம் புகுந்து கொண்டிருக்கின்றனர். ரஷ்யப் படைகளால் இதுவரை உக்ரைனில் 198 பேர் உயிரிழந்திருப்பதாகவும், ஆயிரத்துக்கும் மேற்பட்டோர் காயமடைந்துள்ளதாக உக்ரைன் சுகாதாரத்துறை தெரிவித்துள்ளது. உக்ரைனில் உள்ள இந்தியர்கள் பத்திரமாக மீட்க மத்திய அரசு அனைத்து நடிவடிக்கைகளையும் எடுத்துவருகிறது.

சிக்கிக்கொண்ட நடிகை

இந்நிலையில், மலையாள நடிகையான பிரியா மோகன், உக்ரைனில் சிக்கிக்கொண்டதாகவும் இந்தியா திரும்ப முடியாமல் தவித்து வருவதாகவும் அவரையும் அவரது குடும்பத்தை மீட்க நடவடிக்கை எடுக்க வேண்டும் என தகவல்கள் இணையத்தில் பரவின.

ப்ளீஸ் வேண்டாம்

இதுகுறித்து விளக்கம் அளித்துள்ள பிரியா மோகன், கடந்த ஆகஸ்ட் மாதம் நானும் எனது குடும்பமும் ஆகஸ்ட் மாதம் உக்ரைனுக்கு சுற்றுலாக்காக சென்றோம். தற்போது நானும் எனது குடும்பமும் கொச்சியில் வசித்து வருகிறோம். உக்ரைனில் சிக்கிக்கொண்டதாக வரும் தகவல் முற்றிலும் தவறு, போர் பதற்றம் உள்ள இந்த நேரத்தில் இதுபோன்ற தவறான தகவல்களை பரப்பாதீர்கள். ப்ளீஸ் பொய்யான செய்திகளை வேண்டாம் என கூறியுள்ளார்.