பில்லா 2-ல் அனுஷ்கா?

பில்லா 2 படத்தில் அஜீத்துக்கு ஜோடியாக அனுஷ்கா நடிப்பார் என்று தெரிகிறது.

விஷ்ணுவர்தன் இயக்கும் இந்தப் படத்தை, ரஜினியின் பில்லா படத்தைத் தயாரித்த காலம் சென்ற பாலாஜியின் மகன் சுரேஷ் பாலாஜி தயாரிக்கிறார். நீரவ் ஷா ஒளிப்பதிவு செய்ய, யுவன் ஷங்கர் ராஜா இசையமைக்கிறார்.

ஏப்ரல் மாதம் இந்தப் படத்தின் ஷூட்டிங் தொடங்குகிறது. படத்துக்கு நாயகியாக யாரை ஒப்பந்தம் செய்வது என்பதில் பெரும் குழப்பம் நீடித்து வந்தது. பில்லா தெலுங்குப் பதிப்பில் நாயகியாக நடித்தவர் அனுஷ்கா. கவர்ச்சிக்கு புது இலக்கணமே படைத்தார் அந்தப் படத்தில்.

எனவே பில்லா 2-ல் அவரையே அஜீத் ஜோடியாக்கத் திட்டமிட்டு அணுகினர். ஆனால் தமிழில் ரஜினியைத் தவிர வேறு யாருடனும் இனி நடிப்பதாக இல்லை என்ற 'வைராக்கியத்துடன்' உள்ள அனுஷ்கா, முதலில் மறுத்துவிட்டாராம். பின்னர் பெரிய தொகை, படத்தில் அவருக்கான முக்கியத்துவம் குறித்து விளக்கியதில் 'பார்க்கலாம்' என்று கூறியுள்ளாராம்!