காந்தாரா கனகவதிக்கு போட்டி.. திரெளபதி 2 படத்தில் திரெளபதி தேவியாக நடித்திருப்பது யார் தெரியுமா?

சென்னை: வரலாற்று காவியமாக உருவாகி வரும் 'திரௌபதி 2' திரைப்படத்தில், நடிகை ரக்ஷனா இந்துசூடனின் திரௌபதி தேவி கதாபாத்திரத்தின் கம்பீரமான ஃபர்ஸ்ட் லுக் போஸ்டர் வெளியிடப்பட்டுள்ளது. இந்த வெளியீடு ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.

தமிழ், தெலுங்கு, இந்தி, கன்னடம், மலையாளம் என ஐந்து மொழிகளில் உருவாகி வரும் இத்திரைப்படத்தில், திரௌபதி தேவி வேடத்தில் ரக்ஷனா இந்துசூடன் நடிக்கிறார். இயக்குநர் மோகன்.ஜி-யின் வலுவான கதையில், ஆழமான உணர்வுப்பூர்வத்துடன் வடிவமைக்கப்பட்டுள்ள இக்கதாபாத்திரம், 'திரெளபதி' பட வரிசையில் முக்கியத்துவம் வாய்ந்ததாக அமையும்.

Photo Credit:

Mohan G / Twitter

நேதாஜி புரொடக்சன்ஸ் நிறுவனத்தால் தயாரிக்கப்பட்டு, ஜி.எம். பிலிம் கார்ப்பரேஷன் மற்றும் சோழ சக்கரவர்த்தி நிறுவனங்கள் இணைந்து தயாரிக்கும் 'திரௌபதி 2', 2020-ல் பெரும் வெற்றி பெற்ற 'திரௌபதி' படத்தின் தொடர்ச்சியாக உருவாகிறது. இத்திரைப்படம் 14-ஆம் நூற்றாண்டின் வரலாற்று பின்னணியில் அமைகிறது.

ஹொய்சாள பேரரசர் வீர வள்ளலார் III-இன் கொடூரமான ஆட்சி, சேந்தமங்கலம் காடவராயர்களின் தீரமான எதிர்ப்பு, மற்றும் தமிழ்நாட்டின் முகலாய படையெடுப்பால் ஏற்பட்ட குழப்பமான காலகட்டத்தை கதை சித்தரிக்கிறது. இந்தப் பிரம்மாண்டமான வரலாற்று படத்தின், திரௌபதி தேவியின் ஃபர்ஸ்ட் லுக் போஸ்டர், படத்தின் உணர்ச்சிபூர்வமான அத்தியாயத்தை இரண்டாம் பாகத்துடன் வலுவாக இணைக்கிறது.

வெளியிடப்பட்ட ஃபர்ஸ்ட் லுக் போஸ்டரில், ரக்ஷனா இந்துசூடன் தனது கலாச்சார ஆழத்தை வெளிப்படுத்தும் கண்ணியத்துடனும், கம்பீரத்துடனும் காட்சியளிக்கிறார். இக்கதாபாத்திரம் கதைக்களத்தின் வரலாற்று மற்றும் உணர்வுத் தருணங்களை வலுப்படுத்தி, படத்தின் மையக் கருவான பெண் சக்தியை பிரதிபலிக்கிறது.

ரிச்சர்ட் ரிஷி மற்றும் ரக்ஷனா இந்துசூடன் முக்கிய கதாபாத்திரங்களில் நடிக்க, நடிகர் நட்டி நட்ராஜ் ஒரு முக்கிய பாத்திரத்தை ஏற்றுள்ளார். ஒய்.ஜி.மகேந்திரன், நாடோடிகள் பரணி, சரவண சுப்பையா, வேல ராமமூர்த்தி, சிராஜ் ஜானி, தினேஷ் லம்பா, கணேஷ் கௌரங், திவி, தேவயாணி ஷர்மா, மற்றும் அருணோதயன் ஆகியோரும் இத்திரைப்படத்தில் நடித்துள்ளனர்.

படத்தின் போஸ்ட் புரொடக்சன் பணிகள் விறுவிறுப்பாக நடைபெற்று வருகின்றன. வெளியீட்டுக்கு முன்னதாக படத்தின் விளம்பர பணிகள் தீவிரப்படுத்தப்படும் என படக்குழு தெரிவித்துள்ளது.

தொழில்நுட்பக் குழு: வசனங்கள் - பத்மா சந்திரசேகர், மோகன் ஜி.; இசை - ஜிப்ரான் வைபோதா; ஒளிப்பதிவு - பிலிப் ஆர்.சுந்தர்; எடிட்டிங் - தேவராஜ்; கலை இயக்கம் - கமல்நாதன்; நடனம் - தணிகா டோனி; சண்டைக்காட்சி - ஆக்‌ஷன் சந்தோஷ்; தயாரிப்பு - நேதாஜி புரொடக்ஷன்ஸ் (ஜி. எம் பிலிம் கார்ப்பரேஷன் உடன் இணைந்து); இயக்கம் - மோகன் ஜி.