Kangana Ranaut - அய்யோ உங்கள் படமா வேண்டவே வேண்டாம்.. அனிமல் பட இயக்குநருக்கு கங்கனா பதிலடி

மும்பை: அர்ஜுன் ரெட்டி படத்தின் மூலம் இயக்குநராக அறிமுகமான சந்தீப் ரெட்டி வங்கா சமீபத்தில் அனிமல் படத்தை இயக்கியிருந்தார். ரன்பீர் கபூர், ராஷ்மிகா மந்தனா உள்ளிட்டோர் நடித்திருந்த அந்தப் படம் கடுமையான நெகட்டிவ் விமர்சனங்களை பெற்றது. ரசிகர்கள் மட்டுமின்றி செலிபிரிட்டிகளும் தங்களது ஆதங்கத்தை கொட்டியிருந்தனர். அந்தவகையில் கங்கனா ரணாவத்தும் கடுமையான விமர்சனத்தை முன்வைத்திருந்தார் என்பது குறிப்பிடத்தக்கது.

தெலுங்கில் மெகா ஹிட்டான படம் அர்ஜுன் ரெட்டி. அந்தப் படத்தின் மூலம் இயக்குநராக அறிமுகமானவர் சந்தீப் ரெட்டி வங்கா. சேது படத்தின் அப்டேட் வெர்ஷன் என்று அந்தப் படம் கூறப்பட்டாலும் விஜய் தேவரகொண்டாவுக்கு ரசிகர்களை சேர்த்தது. அந்தப் படம் தமிழ், ஹிந்தி உள்ளிட்ட மொழிகளிலும் ரீமேக்கானது. அந்தப் படத்துக்கு பிறகு ரன்பீர் கபூர், ராஷ்மிகா மந்தனா, அனில் கபூர், பாபி உள்ளிட்டோரை வைத்து சந்தீப் இயக்கிய படம் அனிமல். இந்தப் படம் சில மாதங்களுக்கு முன்பு ரிலீஸானது.

கடும் விமர்சனம்: படம் மிகப்பெரிய எதிர்பார்ப்போடு வெளியானது. ஆனால் படத்தை பார்த்த ரசிகர்கள் கழுவி கழுவி ஊற்றினர். படத்தில் அதீத வன்முறை காட்சிகள், ஆணாதிக்கம் என பல எதிர்மறையான விஷயங்கள் இருப்பதாக ரசிகர்கள் கூறினர். விமர்சன ரீதியாக படம் பெருத்த அடியை சந்தித்தாலும் வசூல் ரீதியாக நல்ல வரவேற்பை பெற்றிருக்கிறதாம். உலகம் முழுவதும் 800லிருந்து 900 கோடி ரூபாய்வரை படம் வசூலித்திருப்பதாக கூறப்படுவது குறிப்பிடத்தக்கது.

செலிபிரிட்டிகளும் விமர்சனம்: படத்துக்கு ரசிகர்கள் மட்டுமின்றி திரைத்துறையை சேர்ந்தவர்களே கடுமையான விமர்சனத்தை கொடுத்தனர். பாடக்ர் ஸ்ரீநிவாஸ், 'அனிமல்களுக்காக எடுக்கப்பட்ட படம்தான் அனிமல்’ என்று கூறியிருந்தார். அதேபோல் நடிகை ராதிகாவும் மறைமுகமாக அனிமலை விமர்சித்திருந்தார். அவர்கள் வரிசையில் கங்கனா ரணாவத்தும் தனது பங்குக்கு, 'பெண்களின் கண்ணியத்தை போக்கும்வகையில் சமீபத்திய படங்கள்’ வெளியாகின்றன என்று குறிப்பிட்டிருந்தார். இப்படி ஏகப்பட்ட விமர்சனங்கள் குவிந்தாலும் 6 பிலிம்பேர் விருதுகளை அள்ளியிருக்கிறது அனிமல் என்பது குறிப்பிடத்தக்கது.

சந்தீப் ரெட்டி வங்கா பதில்: கங்கனாவின் இந்த விமர்சனத்தை குறிப்பிட்டு பேசிய இயக்குநர் சந்தீப் ரெட்டி வங்கா, “கங்கனா ரணாவத் திறமையான நடிகைகளில் ஒருவர். அவர் எனது படத்தை விமர்சித்திருப்பதால் எனக்கு கோபமோ, வருத்தமோ இல்லை. எதிர்காலத்தில் நான் இயக்கப்போகும் படத்தில் கங்கனா ரணாவத்தை நடிக்க வைப்ப முயற்சி செய்வேன்” என்று கூறியிருந்தார்.

கங்னா பதிலடி: சந்தீப் ரெட்டியின் இந்தப் பேச்சுக்கு பதிலடி கொடுத்திருக்கும் கங்கனா ரணாவத், “தயவு செய்து உங்களின் (சந்தீப் ரெட்டி வங்கா) படங்களில் என்னை நடிக்க வைக்க முயற்சி செய்யாதீர்கள். அப்படி நடிக்க வைத்தால் ஆணாதிக்கவாதியாக நடிக்கும் உங்களின் கதாபாத்திரங்கள் பெண்களை போற்றுபவர்களாக மாறிவிடுவார்கள். அது உங்களின் படத்திற்குத்தான் நல்லது அல்ல” என்று குறிப்பிட்டிருக்கிறார்.

கங்கனாவின் எமர்ஜென்ஸி: கங்கனா ரணாவத் பாலிவுட்டில் முன்னணி நடிகையாக வலம் வந்துகொண்டிருப்பவர். ஏகப்பட்ட படங்களில் நடித்திருக்கும் அவர் தேசிய விருதையும் வாங்கியிருக்கிறார். அவர் தற்போது எமர்ஜென்ஸி படத்தில் நடித்துவருகிறார். பாஜகவை சேர்ந்த கங்கனா ரணாவத் தனது மனதில் படும் கருத்துக்களை பட்டென்று போட்டு உடைக்கும் குணம் உடையவர். இதனாலேயே அவர் பல முறை சர்ச்சைகளை சந்தித்திருக்கிறார். இப்போது சந்தீப் ரெட்டி வங்காவுக்கு அவர் கொடுத்திருக்கும் பதிலடியை பார்த்த ரசிகர்கள் கங்கனாவுக்கு சப்போர்ட் செய்து சமூக வலைதளங்களில் கருத்துக்களை பதிவிட்டு வருகிறார்கள் என்பது குறிப்பிடத்தக்கது.