பிக் பாஸ் 6 ரியாலிட்டி ஷோவில் 'செக்ஸி' கிம் கர்தஷியான்?

By Sudha

Published: Wednesday, June 20, 2012, 14:00 [IST]

எதையெடுத்தாலும் கவர்ச்சி என்றாகி விட்டது. பிக் பாஸ் மட்டும் விதி விலக்காக இருக்க முடியுமா என்ன.. வீணா மாலிக்கை வைத்து பிக் பாஸ் நிகழ்ச்சிக்கு சூடு சேர்த்த பிக் பாஸ் ஏற்பாட்டாளர்கள், அடுத்து 6வது எபிசோடில் கிம் கர்தஷியானை கூட்டி வர திட்டமிட்டுள்ளதாக செய்திகள் கூறுகின்றன.

அமெரிக்காவைச் சேர்ந்த கிம், ஒரு மாடல் அழகி, நடிகை மற்றும் டிவி ரியாலிட்டி ஸ்டார் ஆவார். 6வது பிக் பாஸ் நிகழ்ச்சியில் அவரை சேர்க்க நிகழ்ச்சி ஏற்பாட்டாளர்கள் முயன்று வருகின்றனராம். கிம் வந்தால் நிகழ்ச்சிக்கு கும் புகழ் கிடைக்கும் என்ற ஒரே காரணத்திற்காக அவரை இழுக்க முயற்சிப்பதாக தெரிகிறது. ஆனால் அவரோ நாலரை கோடி கொடுத்தால் வருகிறேன் என்று தனது ஏஜென்டுகள் மூலம் ஓலை அனுப்பியுள்ளதாக கூறப்படுகிறது.

பிக் பாஸ் வீட்டுக்கு கவர்ச்சி திலகங்கள் வருவது என்பது புதிதல்ல. ஏற்கனவே 4வது சீசனின்போது பமீலா ஆண்டர்சனை அழைத்து வந்து கவர்ச்சி களை கட்டினர். இதே நிகழ்ச்சியில் பாகிஸ்தான் நடிகை வீணா மாலிக் செய்த கவர்ச்சி அலப்பறைகள் இன்னும் ரசிகர்களால் மறக்க முடியாதது. அதேபோல 5வது சீசனில் ஆபாசப் பட நடிகை சன்னி லியோனை வரவழைத்து அனைவரையும் வியர்க்க வைத்தனர்.

சன்னி லியோன் வந்து போனதற்குப் பிறகு, யாராவது ஒருவர் அவரைப் போன்ற கவர்ச்சியுடன் இருந்தாக வேண்டிய நிலை ஏற்பட்டு விட்டதாம். சன்னி இடத்தை கிம்மால்தான் நிரப்ப முடியும் என்று முடிவெடுத்தே கிம்மை அணுகியுள்ளனராம்.

இந்த நிகழ்ச்சியின் வடிவமைப்பாளரான என்டமோல் இந்தியா நிறுவனத்தின் சிஇஓ தீபக் தர் இதுகுறித்துக் கூறுகையில், பல சர்வதேச பிரபலங்களை அணுகியுள்ளோம். இன்னும் எதுவும் முடிவாகவில்லை என்றார்.

ஒரு வேளை கிம் வந்தால் கூட அவருக்கு ஒரு சிக்கல் இருக்கிறது. சமீபத்தில் அவர் அளித்த ஒரு பேட்டியில் இந்திய உணவு வகைகள் தனக்கு அறுவறுப்பாக இருப்பதாக கூறியிருந்தார். எனவே கிம், இந்த நிகழ்ச்சியில் கலந்து கொண்டால் அவருக்கு எதிர்ப்பு தெரிவித்து சிவசேனா, மகாராஷ்டிர நவ நிர்மான் சேனா உள்ளிட்ட அமைப்புகள் போர்க்கொடி உயர்த்தி பஞ்சாயத்தைக் கூட்டலாம் என்று எதிர்பார்க்கப்படுகிறது.

ஒரு வேளை அத்தகைய குப்பாச்சு குழப்பாச்சுக்களை எதிர்பார்த்தே, பப்ளிசிட்டியை மனதில் கொண்டே கிம்மை வரவழைக்க முயற்சிக்கிறார்களோ என்னவோ...