பேர்தானே... வெச்சுக்கங்க! - ஜிவி பிரகாஷுக்கு ஓகே சொன்ன நயன்தாரா

த்ரிஷா இல்லேன்னா நயன்தாரா படத்தில் தன் பெயரை பயன்படுத்திக் கொள்ள எந்தத் தடையும் இல்லை என்று ஜிவி பிரகாஷுக்கு நயன்தாரா அனுமதிக் கடிதம் அளித்துள்ளார்.

ஜிவி பிரகாஷ் குமார் ஹீரோவாக நடிக்கும் புதிய படம் த்ரிஷா இல்லேன்னா நயன்தாரா.

இந்தப் படத்தில் அவருக்கு ஜோடியாக நடிப்பவர் ஆனந்தி. கயல் படத்தில் நாயகியாக நடித்துக் கொண்டிருக்கிறார். ஆதிக் ரவிச்சந்திரன் இயக்கும் இந்தப் படத்தின் தலைப்பு, உயிருடன் இருக்கும் நடிகைகளின் பெயர்களை உள்ளடக்கியிருப்பதால், அவர்களின் அனுமதி வேண்டும் என்பது தயாரிப்பாளர் சங்க நிபந்தனை.

இதனைத் தொடர்ந்து நயன்தாரா, த்ரிஷா இருவரையும் சந்தித்து அனுமதிக் கடிதம் கோரினார் ஜிவி பிரகாஷ். இவர்களில் நயன்தாரா தனது பெயரைப் பயன்படுத்திக் கொள்ள ஆட்சேபணை இல்லை என்று கடிதம் கொடுத்துவிட்டார்.

அடுத்து த்ரிஷாவும் விரைவில் அனுமதி தருவதாகக் கூறியுள்ளாராம்.

இந்தப் படத்தில் பாரதிராஜா, அவருக்கு ஜோடியாக ஸ்ரீதேவி ஆகியோர் நடிக்கின்றனர்.