ஸ்ரீதேவி பொண்ணுன்னா எப்படி வேணா நடிக்கலாமா?.. ஜான்வி கபூரை விளாசிய பவித்ரா மேனன்!

திருவனந்தபுரம்: ஜான்வி கபூரின் வரவிருக்கும் 'பரம் சுந்தரி' திரைப்படம், வெளியீட்டிற்கு முன்பே விமர்சனங்களை எதிர்கொண்டுள்ளது. இத்திரைப்படத்தின் டிரெய்லர் வெளியான நிலையில், ஜான்வி கபூரின் மலையாளக் கதாபாத்திரம் மற்றும் அவரது உச்சரிப்பு குறித்து மலையாள நடிகர் பவித்ரா மேனன் கேள்வி எழுப்பியுள்ளார்.

மலையாளிகள் கதாபாத்திரத்தில் நடிக்க ஏன் கேரளாவைச் சேர்ந்த நடிகர்களைத் தேர்வு செய்யவில்லை என்று பவித்ரா மேனன் தனது இன்ஸ்டாகிராம் பக்கத்தில் கேள்வி எழுப்பினார். பாலிவுட் சினிமாவில் மலையாளிகள் தவறாகச் சித்தரிக்கப்படுவதாக அவர் குற்றம் சாட்டினார். இது கலாச்சாரம் மற்றும் மொழி குறித்த விவாதத்தைத் தூண்டியுள்ளது.

நடிகை பவித்ரா மேனன் தனது இன்ஸ்டாகிராம் வீடியோவில், "'நான் பவித்ரா மேனன். நான் ஒரு மலையாளி, 'பரம் சுந்தரி' படத்தின் டிரெய்லரைப் பார்த்தேன். இதைப்பற்றி நான் சொல்ல நினைக்கிறேன்" என்று குறிப்பிட்டிருந்தார். ஜான்வியின் கதாபாத்திரம் உச்சரிப்பு பிழைகளுடன் தன்னை கேரள பெண் என்று அறிமுகப்படுத்தும் காட்சியை அவர் சுட்டிக்காட்டினார்.

மேலும் அவர், "சரியான மலையாள நடிகர்களை நடிக்க வைப்பதில் என்ன பிரச்சனை? நாங்கள் திறமை குறைந்தவர்களா?" என்று கோபத்துடன் கேட்டார். "கேரளாவில் இப்படிப் பேசுவதில்லை. நான் எப்படி இந்தியில் பேசுகிறேனோ, அதே போல் மலையாளத்தையும் நன்றாகப் பேசுவேன். இந்திப் படத்தில் ஒரு மலையாளிக் கதாபாத்திரத்தில் நடிக்க ஒரு மலையாளியைக் கண்டுபிடிப்பது அவ்வளவு கடினமா?" என்று பவித்ரா கேள்வி எழுப்பினார்.

View this post on Instagram

A post shared by PAVITHRA MENON (@pavithramenon)

பாலிவுட் சினிமா, 90களில் பஞ்சாபியர்களைச் சித்தரித்தது போல், இப்போதும் மலையாளிகளைத் தவறாகச் சித்தரிப்பதாக அவர் குறிப்பிட்டார். "இப்போது 2025 ஆகிவிட்டது. ஒரு மலையாளி எப்படிப் பேசுவார் என்பது எல்லோருக்கும் தெரியும். நாங்கள் சாதாரணமானவர்கள். நாங்கள் எங்கும் மல்லிகைப்பூ அணிந்து மோகினியாட்டம் ஆடுவதில்லை" என்று அவர் கூறினார்.

அவரது பதிவு பல ரசிகர்களின் ஆதரவைப் பெற்றது. ஒருவர், "குறைந்தபட்சம் ஒரு மலையாள டப்பிங் கலைஞராவது இருந்திருக்கலாம்" என்று கருத்து தெரிவித்தார். மற்றொருவர், "இந்தக் கருத்தை நான் ஆதரிக்கிறேன்" என்றார். "மலையாளிகள் மட்டுமல்ல, வங்காளிகளும் கூட. பாலிவுட்டில் அனைத்து வங்காளப் பெண்களும் புடவை, பொட்டு, காஜல் அணிந்து தாகூர் பாடல்களைப் பாடுவதாக ஒரு கருத்து உள்ளது" என்று ஒரு பயனர் குறிப்பிட்டார்.

ஷாருக்கானின் சென்னை எக்ஸ்பிரஸ் படத்தில் தீபிகா படுகோன், 2 ஸ்டேட்ஸ் படத்தில் ஆலியா பட் உள்ளிட்டோரும் வேறு மாநில பெண்களாக நடித்திருப்பார்கள். நடிகை ஸ்ரீதேவி பல்வேறு மொழிகளில் நடித்து அசத்தியவர்கள். மோகன்லால்ம் மம்மூட்டி தமிழில் நடிப்பதில்லையா? பிருத்விராஜ் பாலிவுட் படங்களில் நடிப்பதில்லையா? நடிகர்களை நடிகர்களாக மட்டுமே பார்க்க வேண்டுமே தவிர எந்த மொழிக்காரர், எந்த சாதிக்காரர், எந்த மதத்துக்காரர் என்று பார்க்கக் கூடாது என்று ஜான்வி கபூர் ரசிகர்களும் பதிலடி கொடுத்து வருகின்றனர். தேவரா படத்தில் தெலுங்கு பெண்ணாக ஜான்வி கபூர் நல்லாத்தான் நடித்திருந்தார் என்றும் பரம் சுந்தரி படமும் ஹிட்டாகும் என்றும் கூறுகின்றனர்.

மலையாள நடிகைகளை தொடர்ந்து தமிழ்ப் படங்களில் நடிக்க வைப்பது குறித்த கேள்விகளும் கோலிவுட்டில் சர்ச்சைகளை கிளப்பி வரும் நிலையில், இந்தி நடிகையை மலையாள பெண்ணாக காட்டியிருப்பதற்கு எதிர்ப்பு கிளம்பியுள்ளது.

டெல்லியைச் சேர்ந்த ஒரு ஆணுக்கும், மலையாளப் பெண்ணுக்கும் இடையிலான காதலைச் சொல்லும் இந்தப் படத்தில், சித்தார்த் மல்ஹோத்ரா, ஜான்வி கபூர் தவிர ராஜீவ் கண்டேல்வால், ஆகாஷ் தஹியா ஆகியோரும் முக்கிய வேடங்களில் நடித்துள்ளனர். துஷார் ஜலோடா இயக்கிய 'பரம் சுந்தரி' ஆகஸ்ட் 29 அன்று வெளியாக உள்ளது.