டோலிவுட், கோலிவுட்டில் தலா ஒன்று, பாலிவுட்டில் நான்கு.... இது ஸ்ருதி ஹாசன் கணக்கு!

சென்னை: நடிகை ஸ்ருதி ஹாசனுக்கு இந்த வருடம் கை நிறைய படம் கொட்டிக் கிடக்கிறது. இந்த வருடம் ஸ்ருதி நடித்து ரிலீசாக உள்ள ஆறு படங்களில் 4 பாலிவுட் படங்கள் என்பது கூடுதல் சிறப்பு.

கமல்ஹாசன் மகள், ஸ்ருதி, தமிழில் நடித்த படங்கள் இன்னும் பெரிய தாக்கத்தை ஏற்படுத்தவில்லை. ஆனால் தெலுங்கில் ராசியான ஹீரோயின் என்ற பெயரை தட்டிச் சென்றுள்ளார். இந்தி திரையுலகமான பாலிவுட்டிலும், ஸ்ருதி ஹாசன் முன்னணி ஹீரோயினாக உருவாகியுள்ளார். 2015ம் ஆண்டு பாலிவுட்டில் ஸ்ருதிஹாசன் கொடி பறக்கப்போகிறது என்றால் அது புகழ்ச்சியாகாது.

ஏனெனில் இவ்வாண்டு பாலிவுட்டில் ஸ்ருதி நடித்து நான்கு படங்கள் வெளியாக உள்ளன. முன்னணி நடிகர் அக்ஷய் குமாருடன் ஜோடியாக நடித்துள்ள கப்பார் என்ற திரைப்படமும் அதில் ஒன்றாகும். ஜான் ஆப்பிரஹாமுடன், ராக்கி ஹேண்ட்சம் மற்றும் வெல்கம் பேக் ஆகிய படங்களில் அவர் நடித்துள்ளார். இதுதவிர, தமிழ் மற்றும் தெலுங்கில் தலா ஒரு படங்களில் ஸ்ருதி ஹாசன் நடித்து வருகிறார்.