சில்வஸ்டர் ஸ்டலோன் படப்பிடிப்பில் விபத்து - ஸ்டன்ட் நடிகர் பலி!

By Shankar

| Published: Saturday, October 29, 2011, 17:08 [IST]

சோபியா: பிரபல நடிகர் சில்வஸ்டர் ஸ்டலோனின் 'எக்ஸ்பேண்டபிள்ஸ் 2' படப்பிடிப்பில் ஏற்பட்ட திடீர் விபத்தில் அவரது ஸ்டன்ட் நடிகர் மரணமடைந்தார்.

பிரபல ஹாலிவுட் நடிகர் சில்வர்ஸ்டர் ஸ்டலோன், இப்போது 'தி எக்ஸ்பேண்டபிள்ஸ்-2' என்ற ஆங்கில படத்தில் நடித்து வருகிறார். இந்த படத்தின் படப்பிடிப்பு பல்கேரியா நாட்டில் நடைபெற்று வருகிறது. இப்படத்தின் படகு சண்டை காட்சி அங்குள்ள ஆக்னியானோவ் அணையில் படமாக்கினர். காட்சிப்படி படகுகள் போலி குண்டு வீசி தகர்க்கப்பட்டது.

அதில் ஒரு குண்டு பயங்கரமாக வெடித்ததில் படகு விபத்துக்குள்ளானது. இதில், ஸ்டண்ட் நடிகர் ஒருவர் அதே இடத்தில் பலியானார். மற்றொருவர் படுகாயம் அடைந்தார். உடனே, அவரை மருத்துவமனையில் அனுமதித்தனர். அங்கு அவர் உயிருக்கு போராடிய நிலையில் சிகிச்சை பெற்று வருகிறார்.

இந்த விபத்து நடைபெறும் போது நடிகர் சில்வர்ஸ்டார் ஸ்டலோன் அங்கு இல்லை. வேறு ஒரு இடத்தில் நடந்த படப்பிடிப்பில் இருந்தார். இந்த விபத்து குறித்து விசாரணை நடைபெறுகிறது.