கேட் உமனுடன் இணைந்து மிரட்ட வருகிறார் புதிய பேட்மேன்.. புதிய போஸ்டருடன் வெளியான ரிலீஸ் தேதி!

அமுல் பேபி பேட்மேன்

கிறிஸ்டியன் பேல், பென் அஃப்லெக் என ஏகப்பட்ட பிரபல ஹாலிவுட் நடிகர்கள் பேட்மேன் கதாபாத்திரங்களில் நடித்துள்ளனர். இந்நிலையில், புதிய பேட்மேனாக அமுல் பேபி ராபர்ட் பேட்டின்சன் டெரர் மோடுக்கு மாறியுள்ளார். ஹாரி பாட்டர் படத்தில் செடரிக் டிகோரி எனும் கதாபாத்திரத்தில் நடித்த ராபர்ட் பேட்டின்சன் உலகளவில் ஹிட்டான ட்விலைட் சாகா வரிசை படங்களில் ரொமான்டிக் பாயாக நடித்திருப்பார்.

கிறிஸ்டோபர் நோலன் படத்தில்

இயக்குநர் கிறிஸ்டோபர் நோலனின் ஆச்சர்யங்கள் நிறைந்த டெனெட் படத்தில் இன்னொரு ஹீரோவாக நடித்திருப்பார் ராபர்ட் பேட்டின்சன். டெனெட் படத்தில் ராபர்ட் பேட்டின்சனின் கதாபாத்திரமே ஒரு பெரிய புதிராகவும் அதற்கு ஏகப்பட்ட டிகோடிங்கும் சமூக வலைதளத்தில் பல ஹாலிவுட் ரிவ்யூவர்கள் செய்துள்ளது குறிப்பிடத்தக்கது.

கேட் உமனுடன் பேட்மேன்

விரைவில் பேட்மேன் திரைப்படம் வெளியாக உள்ள நிலையில், தற்போது அதனை அதிகாரப்பூர்வமாக அறிவிக்கும் விதமாக புதிய போஸ்டரை படக்குழு வெளியிட்டுள்ளது. அந்த போஸ்டரில் பேட்மேன் மற்றும் கேட் உமன் ஆகிய இருவரும் இடம்பெற்றுள்ளனர். மற்றொரு போஸ்டரில் பேட்மேன் மட்டுமே தனியாக இருப்பது ரசிகர்களை உற்சாகப்படுத்தி உள்ளது.

கேட் உமனாக யார்

அனா ஹாத்வே முதல் ஏகப்பட்ட பிரபல ஹாலிவுட் நடிகைகளும் பேட்மேன் மாறும் போதெல்லாம் கேட் உமனாக நடித்து உள்ளனர். இந்நிலையில், ராபர்ட் பேட்டின்சன் பேட்மேனாக நடித்துள்ள இந்த புதிய படத்தில் கேட் உமனாக ஸோ கிராவிட்ஸ் எனும் அமெரிக்க நடிகை மற்றும் பாடகி நடித்துள்ளார். இவர் ஏற்கனவே ஃபென்டாஸ்டிக் பீஸ்ட், டைவர்ஜென்ட் உள்ளிட்ட பல பிரபல படங்களில் இவர் நடித்துள்ளார்.

எப்போ ரிலீஸ்

உலகளவில் கொரோனா மற்றும் ஓமிக்ரான் பரவல்கள் பல கோடி மக்களை பாதித்து வரும் நிலையில், வரும் மார்ச் மாதம் கொரோனா தொற்று படிப்படியாக குறையும் என ஹாலிவுட் முதல் கோலிவுட் வரை சினிம துறையினர் நம்பி வருகின்றனர். பேட்மேன் படத்தையும் மார்ச் 4ம் தேதி இந்த ஆண்டு வெளியிட படக்குழு முடிவு செய்துள்ளது. எல்லாம் கொரோனா கையில்!