என் வாழ்க்கை திரும்ப கிடைச்சிடுச்சு.. சந்தோஷப்பட்ட ஜானி டெப்.. பழையபடி பட வாய்ப்புகள் குவியுமா?

என் வாழ்க்கை திரும்ப கிடைச்சிடுச்சு

அவதூறு வழக்கில் நடிகர் ஜானி டெப்புக்கு பெரும்பான்மையான ஆதரவோடு நீதிபதி தீர்ப்பு வழங்கிய நிலையில், "என் வாழ்க்கையை நீதிபதி திரும்ப கொடுத்துட்டாரு" எனக் கூறி தனது சந்தோஷத்தை வெளிப்படுத்தி உள்ளார் நடிகர் ஜானி டெப். கடந்த 2018ம் ஆண்டு முதல் ஏகப்பட்ட சிக்கல்களையும் தொழில் இழப்புகளையும் சந்தித்து இருந்தார் ஜானி டெப்.

அதிரடி நீக்கம்

2003ம் ஆண்டு முதல் பைரேட்ஸ் ஆஃப் தி கரீபியன் படங்களில் ஜேக்ஸ் பேரோவாக நடித்து வந்து சர்வதேச அளவில் பிரபலமானவர் நடிகர் ஜானி டெப். இதுவரை வெளியான 5 பாகங்களிலும் அவர் தான் கேப்டன் ஜேக்ஸ் பேரோ. ஆனால், ஆம்பர் ஹெர்டுக்கு எதிராக அவர் வழக்கு தொடுத்த நிலையில், இருவருக்கும் இடையே ஏற்பட்ட மோதல் காரணமாக 6வது பாகத்தில் இருந்து ஜானி டெப் அதிரடியாக நீக்கப்பட்டார்.

22.5 மில்லியன் டாலர் இழப்பு

அந்த படத்தில் நடித்திருந்தால் ஜானி டெப்புக்கு 22.5 மில்லியன் டாலர் சம்பளம் கிடைத்திருக்கும் என்றும் ஆனால், இந்த அவதூறு வழக்கு காரணமாக அவருக்கு அத்தனை பெரிய தொகை கிடைக்காமல் போனது மிகப்பெரிய இழப்பாக மாறியது என்றும் ஹாலிவுட் வட்டாரங்கள் தெரிவித்துள்ளனர்.

இருவருக்கும் நஷ்டம்

விவாகரத்து செய்து விட்டு பிரிந்து இருவரும் அமைதியாக வாழ்ந்திருந்தால் எந்தவொரு இழப்பும் இருவருக்குமே ஏற்பட்டு இருக்காது என்றும், மாறாக நீயா நானா என பார்த்து விடலாம் என நீதிமன்றத்தில் ஒருவரை ஒருவர் டேமேஜ் செய்ததன் விளைவாக இருவருக்கும் அவர்களது சினிமா வாழ்க்கையில் மிகப்பெரிய இழப்பு ஏற்பட்டுள்ளதாகவும் கூறுகின்றனர்.

பட வாய்ப்புகள் குவியுமா

ஜானி டெப்புக்கு ஆதரவாக தீர்ப்பு கிடைத்துள்ள நிலையில், மீண்டும் பழையபடி பட வாய்ப்புகள் குவியுமா? என்கிற கேள்வியும் எழுந்துள்ளது. ஆனால், கடந்த சில ஆண்டுகளாக அதிக போதைக்கு தன்னை ஆட்படுத்திக் கொண்டு உடல் நலத்தை பேணாத நிலையில், பிரம்மாண்ட படங்களில் முன்பை போல ஹீரோவாக நடிக்கும் வாய்ப்புகள் கிடைப்பது சந்தேகம் தான் என்றும் தன்னை பழைய பன்னீர்செல்வமாக அவர் மாற்றிக் கொண்டால் தான் ஹாலிவுட்டில் ஹீரோவாக நடிக்க முடியும் என்றும் தகவல்கள் வெளியாகி உள்ளன.

மெல் கிப்சன், மர்லன் பிராண்டோ

பிரபல ஹாலிவுட் நடிகர்களான மர்லன் பிராண்டோ மற்றும் மெல் கிப்சன் போன்றவர்களும் இதுபோன்ற நீதிமன்ற வழக்குகளை சந்தித்து பின்னர் சினிமாவிலும் மிகப்பெரிய அளவில் சாதித்துள்ளனர். ஜானி டெப் பெரும் நம்பிக்கையுடன் அப்படியொரு வார்த்தையை கூறியுள்ள நிலையில், இந்த கான்ட்ரவெர்சி மற்றும் அவருக்கு ஆதரவளித்துள்ள ரசிகர்களை மனதில் கொண்டு கூட சில பெரிய தயாரிப்பு நிறுவனங்கள் அவரை அணுகவும் வாய்ப்புகள் அதிகம் என்றும் கூறுகின்றனர்.