சூப்பர் ஸ்டார் பிறந்த நாளில் கோச்சடையான் இசை!

சென்னை: சூப்பர் ஸ்டார் ரஜினியின் பிறந்த நாளான டிசம்பர் 12-ம் தேதி, அவரது கோச்சடையான் இசை உலகமெங்கும் வெளியாகிறது.

சௌந்தர்யா இயக்கத்தில் ரஜினி - தீபிகா படுகோன் நடித்துள்ள கோச்சடையான் படத்தின் வெளியீட்டுத் தேதி நேற்று அதிகாரப்பூர்வமாக அறிவிக்கப்பட்டுவிட்டது.

பொங்கல் ஸ்பெஷலாக ஜனவரி 10-ம் தேதி இந்தப் படம் உலகமெங்கும் வெளியாகிறது.

அதற்கு முன் சூப்பர் ஸ்டார் ரஜினியின் பிறந்த நாளில் இந்தப் படத்தின் இசையை வெளியிடுவதாக இன்று நாளிதழ்களில் விளம்பரங்களை வெளியிட்டுள்ளனர் கோச்சடையான் குழுவினர்.

ஏஆர் ரஹ்மான் இசையமைக்க அனைத்துப் பாடல்களையும் வைரமுத்து எழுதியுள்ளார். படத்தின் பாடல்களுக்கு சாம்பிளாக ஒரு டீசரை வெளியிட்டிருந்தனர் சமீபத்தில். எங்கே போகுதோ வானம் என்ற அந்தப் பாடல் அத்தனை ரசிகர்களின் ஏகோபித்த வரவேற்பையும் பெற்றது.

இந்தப் படத்துக்காக தமிழ் மற்றும் இந்தியில் ரஜினியே சொந்தக் குரலில் ஒரு பாடல் பாடியுள்ளார்.

கோச்சடையான் பாடல்களுக்கான எதிர்ப்பார்ப்பு உச்சத்தில் உள்ளது. இணையதளங்களில் இந்தப் படத்தின் பாடல் இசைத் தட்டுக்களுக்கான முன்பதிவு சூடுபிடிக்கத் தொடங்கியுள்ளது.