நக்மாவா...யாரது? - திணற வைத்த கார்கே!!

By Staff

| Published: Tuesday, March 17, 2009, 17:17 [IST]

இப்படியொரு கேள்வியைக் கேட்டவர் வேறு யாருமல்ல... காங்கிரஸ் கட்சியின் முக்கியத் தலைவரும் தேர்தல் பணிக்குழுத் தலைவருமான மல்லிகார்ஜுன கார்கே. அதுவும் அந்தக் கட்சிக்காக அல்லும் பகலும் பிரச்சாரத்தில் இறங்கியிருக்கும் நக்மாவை நேருக்கு நேர் பார்த்தபடி இப்படியொரு கேள்வியைக் கேட்டுவிட்டாராம். மயக்கம் வராத குறை நக்மாவுக்கு. எல்லோர் முன்னிலையிலும் வேறு கேட்டு விட்டதால், தன்னைப் பற்றி தானே ஒரு அறிமுகம் தரவேண்டியதாகிவிட்டதாம் அம்மணிக்கு.

எங்கே நடந்தது இது?

தேர்தலில் போட்டியிட விரும்பும் வேட்பாளர்களை நேர்காணல் செய்யும் பொறுப்பு மல்லிகார்ஜுன கார்கேவுக்கு. காங்கிரஸ் சார்பில் வடமேற்கு மும்பை தொகுதியில் போட்டியிட விருப்பம் தெரிவித்து நடிகை நக்மா விண்ணப்பம் கொடுத்திருந்தார்.

நேற்று நடந்த நேர்காணலிலும் அவர் கலந்து கொண்டார். அப்போது அவரைப் பார்த்த கார்கே, நக்மான்னா யார்? அவரோட சாதனை என்ன? என்று கேட்டாராம்.

ஒரு கணம் ஆடிப் போன நக்மா... 'என்னைத் தெரியவி்ல்லையா... நான்தான் நக்மா!' என்று கூறியுள்ளார். உடனே, 'எந்த அடிப்படையில் நீங்கள் சீட் கேட்கிறீகள்... உங்களுக்கு யாரையெல்லாம் தெரியும்?' என்றாராம் கருமமே கண்ணாக.

உடன் வந்தவர்கள் சங்கடத்தில் நெளிய, வேறு வழியின்றி தன்னைப் பற்றி சொல்லத் தொடங்கினாராம் நக்மா. உடனே நக்மாவின் உதவிக்கு வந்துள்ளார் மற்றொரு மூத்த தலைவரான பி.சி.கொண்டையா. அவர் நக்மாவின் அருமை பெருமைகளை கார்கேவுக்கு எடுத்துக் கூற, அப்போதும் விளங்கிக்கொள்ளாத கார்கே இப்படிக் கூறினாராம்:

உங்கள் விண்ணப்பத்தை பரிசீலிப்போம்... போய் வாருங்கள்!

தேர்தலில் நிற்கும் ஆசையே போய்விட்டதாம் நக்மாவுக்கு!!