பில்லா 2... விலகினார் விஷ்ணுவர்தன்!!

அஜீத் நடிக்கும் பில்லா படத்தை இயக்கும் பொறுப்பிலிருந்து விலகிக் கொண்டார் விஷ்ணுவர்தன்.

அவருக்கு பதிலாக சக்ரி டோலட்டி பில்லா -2ன் இயக்குநராக அறிவிக்கப்பட்டுள்ளார். இவர் ஏற்கெனவே தமிழில் கமல் நடித்த உன்னைப் போல் ஒருவன் படத்தை இயக்கியவர் என்பது குறிப்பிடத்தக்கது.

சரி... ஏன் விலகினார் விஷ்ணு?

அவர் தரப்பில் கூறப்படும் விளக்கம் இது:

"விரைவில் பில்லா 2 படத்தின் ஷூட்டிங் ஆரம்பிக்கப்பட வேண்டிய கட்டாயம். நானோ இப்போது பவன் கல்யாண் நடிக்கும் தி ஷேடோ தெலுங்குப் படத்தில் பிஸியாக உள்ளேன்.

இந்த நேரத்தில் பில்லா 2-யும் ஆரம்பித்துவிட்டால், தேவையற்ற சிக்கல்கள் நேரும். எனவே நானாகவே முன்வந்து இந்த பெரி்ய வாய்ப்பை விட்டுத் தருகிறேன்" என்றார் விஷ்ணு.

ஆனால் உண்மையில் பில்லா 2 இப்போதைக்குத் துவங்கும் படமல்ல. காரணம் அஜீத் மங்காத்தாவை முடிக்கவே இன்னும் இரண்டு மாதங்கள் தேவைப்படுமாம். அதன் பிறகு குறைந்தது 6 மாதங்களாவது அவர் ஓய்வெடுத்த பிறகுதான் புதிய படம் தொடங்குவார். உண்மை இப்படியிருக்க, விஷ்ணு விலகியிருப்பதன் பின்னணியில் வேறு காரணங்கள் இருப்பதாகச் சொல்கிறார்கள்.

பில்லா 2 படத்தைத் தயாரிப்பவர்கள் அமரர் கே பாலாஜியின் சுஜாதா சினி ஆர்ட்ஸும், இன் என்டர்டெய்ன்மென்ட் நிறுவனமும். ரஜினி நடிப்பில் சரித்திரம் படைத்த பழைய பில்லாவை எடுத்தது இதே கே பாலாஜிதான் என்பது நினைவிருக்கலாம்.