மருத்துவமனையில் கே.பாலாஜி

By Staff

| Published: Wednesday, April 22, 2009, 13:36 [IST]

பழம்பெரும் திரைப்பட தயாரிப்பாளர் கே.பாலாஜி உடல் நலக்குறைவு காரணமாக மருத்துவமனையில் சேர்க்கப்பட்டுள்ளார்.

அப்பல்லோ மருத்துவமனையில் அவருக்கு தீவிர சிகிச்சை அளிக்கப்பட்டு வருகிறது.

நடிகர் திலகம் சிவாஜியுடன் நிறைய படங்களில் நடித்து, பின்னாளில் முன்னணி பட அதிபராக உயர்ந்தவர் கே.பாலாஜி.

சுஜாதா சினி ஆர்ட்ஸ் மற்றும் சுரேஷ் புரொடக்ஷன்ஸ் பேனர்களில் ராஜா, நீதி, பில்லா, தீ, விதி போன்ற சூப்பர் ஹிட் படங்களைத் தந்தவர். சில கசப்பான அனுபவங்களால் படத்தயாரிப்பிலிருந்து ஒதுங்கியிருந்த அவர், தன் மகன் மூலம் கிரீடம் படத்தைத் தயாரித்தார்.

சிறுநீரகக் கோளாறில் அவதிப்பட்டு வந்த பாலாஜிக்கு கடந்த சில ஆண்டுகளாகவே டயாலிசிஸ் சிகிச்சை அளிக்கப்பட்டு வந்தது. இந் நிலையில் நேற்று அவருடைய உடல்நிலை மிகவும் மோசமானது.

இதையடுத்து சென்னை அப்பல்லோ மருத்துவமனையின் தீவிர சிகிச்சைப் பிரிவில் சேர்க்கப்பட்டுள்ளார் பாலாஜி. இவரது மருமகன் தான் மலையாள சூப்பர் ஸ்டார் மோகன் லால் ஆவார்.