ஷூட்டிங்கில் கிரேன் சரிந்து விபத்து: அதிர்ஷ்டவசமாக உயிர் தப்பிய கே.ஆர். விஜயா, மோனிகா

சென்னை: சுவடுகள் படப்பிடிப்பில் கிரேன் சரிந்து விபத்து ஏற்பட்டதில் கே.ஆர். விஜயா, மோனிகா ஆகியோர் அதிர்ஷ்டவசமாக உயிர் தப்பினர்.

ஜெய்பாலா கதை, திரைக்கதை எழுதி, இயக்கி ஹீரோவாக நடிக்கும் படம் சுவடுகள். இந்த படத்தில் மோனிகா நாயகியாகவும், கே.ஆர். விஜயா முக்கிய கதாபாத்திரத்திலும் நடிக்கின்றனர்.

படத்தின் ஷூட்டிங் குற்றாலத்தில் நடந்தது. அப்போது கே.ஆர். விஜயா, மோனிகா வரும் காட்சியை படமாக்கிக் கொண்டிருந்தனர். 40 அடி உயர கிரேனில் கேமராவை வைத்து படமாக்கினர். குற்றாலம் பகுதியில் மழை பெய்து மண் ஈரமாக இருந்ததால் கிரேன் பிடிப்பு இன்றி திடீர் என்று சரிந்தது. கிரேன் கே.ஆர். விஜயா, மோனிகா தலையில் விழுவது போன்று வந்தது.

இதைப் பார்த்த படக்குழுவினர் அலற அங்கு ஷூட்டிங்கை வேடிக்கைப் பார்த்துக் கொண்டிருந்த 200 பேர் ஓடிச் சென்று கிரேனை பிடித்தனர். இதனால் நடிகைகள் இருவரும் அதிர்ஷ்டவசமாக உயிர் தப்பினர்.