இந்திய சினிமாவின் பெருமை.. நடிகர் மாதவனுக்கு 'பத்மஸ்ரீ' விருது அறிவிப்பு!

சென்னை: திரையுலகின் 'எவர்கிரீன் சாக்லேட் பாய்' மற்றும் பன்முகத் திறமை கொண்ட சிறந்த நடிகரான ஆர். மாதவனுக்கு கலைத் துறையில் அவரது பங்களிப்பைப் பாராட்டும் வகையில் நாட்டின் உயரிய விருதுகளில் ஒன்றான 'பத்மஸ்ரீ' விருது அறிவிக்கப்பட்டுள்ளது.

சாக்லேட் பாய் டூ பான் இந்தியா ஸ்டார்: மாதவன், 2000 ஆம் ஆண்டு மணிரத்னம் இயக்கத்தில் வெளியான 'அலைபாயுதே' படம் மூலம் தமிழ் சினிமாவில் கதாநாயகனாக அறிமுகமானார். முதல் படத்திலேயே ஒட்டுமொத்த தமிழக பெண்களின் கனவுக்கண்ணனாக வலம் வரத் தொடங்கினார். முதல் படத்தின் வெற்றியைத் தொடர்ந்து மின்னலே, ரன், ஆயுத எழுத்து எனப் பல சூப்பர் ஹிட் படங்களில் நடித்தார். தமிழ் மட்டுமின்றி இந்தித் திரையுலகிலும் கால் பதித்த மாதவன், அமீர்கானுடன் இணைந்து நடித்த 3 Idiots, தனு வெட்ஸ் மனு போன்ற மெகா ஹிட் படங்கள் மூலம் ஒட்டுமொத்த இந்திய அளவில் தன்னை நிலைநிறுத்திக் கொண்டார்.

Photo Credit:

Actor maddy instagram

மிரட்டிய இயக்குநர்: நடிகராக மட்டுமே இருந்த மாதவன், இஸ்ரோ விஞ்ஞானி நம்பி நாராயணனின் வாழ்க்கை வரலாற்றை மையமாகக் கொண்டு உருவான 'ராக்கெட்டரி: தி நம்பி எஃபெக்ட்' என்ற படத்தின் மூலம் இயக்குநராகவும், திரைக்கதை எழுத்தாளராகவும் அவதாரம் எடுத்தார். இந்த படத்திற்காக அவர் பல ஆண்டுகள் மேற்கொண்ட கடுமையான உழைப்பும், அவரது நேர்த்தியான இயக்கமும் உலகளவில் பாராட்டுகளைப் பெற்றது. மேலும், இந்தப் படம் சிறந்த திரைப்படத்திற்கான தேசிய விருதையும் வென்றது.

உயரிய விருது: ஜார்கண்ட் மாநிலத்தில் பிறந்து வளர்ந்த தமிழ் குடும்பத்தைச் சேர்ந்தவர் என்றாலும், அவரது உயர்கல்வி மற்றும் ஆரம்பகால மாடலிங், சின்னத்திரை வாழ்க்கை என எல்லாமே மும்பை மற்றும் கோலாப்பூர் நகரங்களில் தான் ஆரம்பித்தது. தற்போது மகாராஷ்டிர மாநிலத்தின் கலைப் பிரிவின் கீழ் அவருக்கு இந்த பத்மஸ்ரீ விருது அறிவிக்கப்பட்டுள்ளது.

குவியும் வாழ்த்து: சினிமாவில் 25 ஆண்டுகளைக் கடந்து, இன்றும் இளம் நடிகர்களுக்கு டஃப் கொடுக்கும் வகையில் 'விக்ரம் வேதா', வெப் சீரிஸ்கள் மற்றும் தற்போது பல பிரம்மாண்ட இந்தி மற்றும் தமிழ் படங்களில் பிஸியாக நடித்து வரும் மாதவனுக்கு இந்த பத்மஸ்ரீ விருது கிடைத்து இருப்பது மிகவும் பெருமையாக பார்க்கப்படுகிறது. திரையுலக பிரபலங்கள் மற்றும் ரசிகர்கள் பலரும் சோஷியல் மீடியாவில் அவருக்கு வாழ்த்துகளை தெரிவித்து வருகின்றனர்.