கார் டயர் வெடித்து விபத்து: நடிகர் பாபுகணேஷ் பலத்த காயம்

By Mayura Akilan

| Published: Monday, August 18, 2014, 18:41 [IST]

Actor Babu Ganesh injured in car accident

சென்னை: நடிகர் பாபுகணேஷ் சென்ற கார் டயர் வெடித்து விபத்துக்குள்ளானது. இந்த விபத்தில் அவர் பலத்த காயங்களுடன் உயிர் தப்பினார்.

'கடல் புறா' என்ற படத்தில் பாபு கணேஷ் நாயகனாக நடித்துள்ளார். இவரே இப்படத்தை இயக்கவும் செய்தார். தாட்பூட் தஞ்சாவூர், தேசிய பறவை, நடிகை உள்ளிட்ட பல படங்களில் நடித்துள்ளார்.

தற்போது பாபுகணேஷ் காட்டு புறா என்ற பேய் படத்தை இயக்கி நாயகனாகவும் நடிக்கிறார். இந்த படத்துக்காக லொக்கேஷன் பார்ப்பதற்காக பாபுகணேசும் படத்தின் ஒளிப்பதிவாளர் ரவியும் கிருஷ்ணகிரிக்கு காரில் சென்றனர்.

கிருஷ்ணகிரியில் உள்ள பெங்களூர் நெடுஞ்சாலையில் கார் சென்று கொண்டு இருந்த போது திடீரென காரின் இடது பக்க டயர் வெடித்தது. இதனால் கார் நிலை தடுமாறி தாறுமாறாக ஓடியது. திடீரென சாலை ஓரத்தில் இருந்த மரத்தின் மேல் மோதியது.

இந்த விபத்தில் காரின் முன்பகுதி அப்பளம் போல் நொறுங்கியது. பாபு கணேசும், கேமராமேனும் தலை, மார்பு பகுதியில் பலத்த அடிப்பட்டு காயத்துடன் மயங்கி விழுந்தார். அருகில் வீடுகளில் இருந்தவர்கள் ஓடி வந்து இருவரையும் மீட்டு மருத்துவமனை அனுப்பி வைத்தனர்.