அஞ்சான்ல இருந்தது போலவே இருக்காரே.. சூர்யாவின் சூர்யா 42 லுக் குறித்து ரசிகர்கள் உற்சாகம்!

நடிகர் சூர்யா

நடிகர் சூர்யா, நடிகராக மட்டுமில்லாமல் தயாரிப்பாளராகவும் மாஸ் காட்டி வருகிறார். அவரது நடிப்பில் சூரரைப் போற்று, ஜெய் பீம், எதற்கும் துணிந்தவன் என வெற்றிப் படங்களாக அமைந்தன. ரசிகர்களை வெகுவாக கவர்ந்தன. இதற்கெல்லாம் முத்தாய்ப்பு வைத்தது போல சமீபத்தில் அவரது நடிப்பில் வெளியான விக்ரம் படம் அமைந்தது.

ரோலக்ஸ் கேரக்டர்

இந்தப் படத்தில் ரோலக்ஸ் என்ற இவரது கேரக்டர் சில நிமிடங்களே திரையில் வந்தன. இந்தப் படத்திற்காக சூர்யா கொடுத்த கால்ஷீட்டும் அதிகமில்லை. 3 நாட்களில் இந்த காட்சிகளை அவர் நடித்துக் கொடுத்து விட்டார். ஆனால் படத்தின் சக்சஸில் இந்த கேரக்டர் ஏற்படுத்திய பாதிப்பு அளவில் அடங்காதது.

ரோலக்ஸ் ஏற்படுத்திய பாதிப்பு

இதுவரை தான் ஏற்காத கேரக்டரை போகிற போக்கில் செய்வது போல செய்துவிட்டார். சூர்யாவிற்கு ரோலக்ஸ் போன்ற ஒரு கேரக்டரா என்று அனைவரையும் ஆச்சர்யப்படுத்திவிட்டார். முன்னதாக 24 படத்தில் வில்லன் கேரக்டரில் நடித்திருந்தாலும், ரோலக்ஸ் ஏற்படுத்திய பாதிப்பு மிகவும் சிறப்பானது.

வணங்கான் படம்

விக்ரம் 3 படம் சூர்யாவை முன்னிறுத்தியே உருவாக உள்ளது என்பதை படக்குழு முன்னதாகவே தெரிவித்துள்ளது. இந்த வகையில் அந்தப் படம் வெளியாகும்வரையில் இந்த ரோலக்ஸ் கேரக்டரை ரசிகர்கள் சிலாகித்துக் கொண்டுதான் இருப்பார்கள் என்றே தோன்றுகிறது. இதனிடையே பாலா இயக்கத்தில் 18 ஆண்டுகள் கழித்து வணங்கான் படத்தில் நடித்தார் சூர்யா.

விறுவிறுப்பாக நடந்த சூட்டிங்

இந்தப் படத்தின் சூட்டிங் கடந்த சில வாரங்களுக்கு முன்பு கன்னியாகுமரியில் 35 நாட்கள் தொடர்ந்து நடைபெற்றது. தன்னுடைய குருவாக பாலாவை சூர்யா எப்போதுமே சொல்வார். அந்த வகையில் இவர்களது இந்தக் கூட்டணி படத்திற்கு அதிகமான எதிர்பார்ப்பு காணப்பட்டது. அடுத்தக்கட்ட சூட்டிங் கோவாவில் நடைபெறவுள்ளதாக கூறப்பட்ட நிலையில் தற்போது அதுகுறித்து எந்த அப்டேட்டும் இல்லை.

சூர்யா -பாலா இடையில் மனக்கசப்பு?

சூர்யா -பாலா இடையில் சில மனக்கசப்புகள் சூட்டிங்கின்போது ஏற்பட்டதாகவும் அதனால்தான் சூட்டிங் நிறுத்தப்பட்டதாகவும் தகவல்கள் வெளியாகின. அதை நிரூபிக்கும் வகையில் தற்போது அடுத்தக்கட்ட சூட்டிங் குறித்து தகவல்கள் எதுவும் வெளியாகாமல் உள்ளது.

வாடிவாசலுக்காக பயிற்சி

இதனிடையே வணங்கான் படத்தை தொடர்ந்து வெற்றிமாறன் இயக்கத்தில் வாடிவாசல் படத்தில்தான் சூர்யா நடிப்பார் என்றும் கூறப்பட்டது. இதற்கான டெஸ்ட் சூட்டும் நடத்தப்பட்டது. இரண்டு ஜல்லிக்கட்டு மாடுகளை சொந்தமாகவே வாங்கி சூர்யா பயிற்சி செய்து வருவதாகவும் கூறப்பட்டது.

சூர்யா 42 படத்தின் லுக்

இந்நிலையில் இந்த இரண்டு படங்களை விட்டுவிட்டு தற்போது இயக்குநர் சிவா இயக்கத்தில் இணைந்துள்ளார் சூர்யா. இந்தப் படத்தின் சூட்டிங் வரும் 22ம் தேதி துவங்கவுள்ளது. இதனிடையே நேற்றைய தினம் விருமன் சக்சஸ் மீட்டில் கலந்துக் கொண்ட சூர்யாவின் லுக் அனைவரையும் வெகுவாக கவர்ந்தது.

ஸ்மார்ட்டான சூர்யா

இந்த லுக்கில் அஞ்சான் படத்தில் வரும் சூர்யாவை அப்படியே அவர் பிரதிபலிப்பதாக அனைவரும் பாராட்டு தெரிவித்தனர். ஆனால் அதைவிட அழகாக இன்னும் ஸ்மார்ட்டாக சூர்யா நேற்றைய தினம் காணப்பட்டார். அவருக்கு மட்டும் வயதாக வயதாக இளமை கூடிக்கொண்டே போகிறதோ என்று விழாவிற்கு வந்த அனைவரும் சந்தேகம் எழுப்பினர்.