இதுக்கு மேலேயும் கை குலுக்குவீங்க.. அப்பவே சொல்லிருக்காருய்யா வடிவேலு.. தீயாய் பரவும் வீடியோ!

தடுப்பு நடவடிக்கை

கொரோனா வைரஸ் பரவலை தடுக்க மத்திய அரசு பல்வேறு நடவடிக்கைகளை மேற்கொண்டுள்ளது. தமிழக அரசும் பள்ளிகள் மூடல், திரையரங்குகள் மூடல் என பல்வேறு நடவடிக்கைகளை மேற்கொண்டுள்ளது. திரைத்துறை சார்பிலும் கொரோனா பரவலை தடுக்கும் வகையில் படப்பிடிப்புகள் நிறுத்தப்படும் என அறிவிக்கப்பட்டுள்ளது.

பத்திரமாக இருங்கள்

பிரபலங்கள் பலரும் கொரோனா பரவுவதை தடுக்க மக்களுக்கு பல்வேறு அறிவுரைகளை கூறி வருகின்றனர். ஒருவரிடம் இருந்து மற்றொருவருக்கு தொடுதல் மூலம் கொரோனா பரவுகிறது என்பதால் கைக்குலுக்குவதை தவிர்க்க வேண்டும் என தெரிவித்து வருகின்றனர். அந்த வகையில் நடிகர் வைபவும் தனது டிவிட்டர் பக்கத்தில் பத்திரமாக இருங்கள் என டிவிட்டியுள்ளார்.

வைரல் வீடியோ

கூடவே ஒரு வீடியோவையும் ஷேர் செய்திருக்கிறார் வைபவ். அதாவது, ஐயா படத்தில் இடம்பெற்றுள்ள வடிவேலுவின் காமெடிதான் அது. எங்கேயெல்லாம் கை வைத்துவிட்டு எப்படியெல்லாம் கை வைத்து விட்டு கைக்குலுக்குகிறார்கள் என்று வெளுத்து வாங்கியிருப்பார் நடிகர் வடிவேலு. அந்த வீடியோ இப்போது சமூக வலைதளங்களில் வைரலாகி வருகிறது.

வணக்கம் சொல்வது

இந்த வீடியோவை பார்த்த பிறகு நிச்சயமாய் யாரும் யாருக்கும் கைகொடுக்க மாட்டார்கள். இந்த வீடியோவை பார்த்துவிட்டால், யாரு கை கொடுத்தாலும் வடிவேலு பேசியதுதான் ஞாபத்திற்கு வரும். அதுவும் இப்போது இருக்கும் சூழ்நிலையில் யாரும் கை குலுக்கவே மாட்டார்கள். உலக தலைவர்களே கை குலுக்குவதை தவிர்த்து கைகளை குவித்து வணக்கம் சொல்லும் பழக்கத்தை பின்பற்றி வருகின்றனர் குறிப்பிடத்தக்கது.