Hatred தலையெல்லாம் காவி.. குட்டி ஸ்டோரிய வச்சு நல்லா ஊம குத்து குத்துறாருய்யா தளபதி!

சிங்கிள் ட்ராக்

இந்த படத்திற்கு அனிருத் இசையமைத்துள்ளார். இந்நிலையில் மாஸ்டர் படத்தின் முதல் சிங்கிள் ட்ராக் இன்று வெளியாகியுள்ளது. படத்தின் கதாநாயகனான நடிகர் விஜய் தனது டிவிட்டர் பக்கத்தில் பாடலின் சிங்கிள் ட்ராக்கை வெளியிட்டார். லெட் மீ சிங் எ குட்டி ஸ்டோரி என தொடங்குகிறது அந்த பாடல்.

பேராசிரியர்

மாஸ்டர் படத்தில் நடிகர் விஜய் கல்லூரி பேராசிரியர் கதாப்பாத்திரத்தில் நடிக்கிறார். இதனால் இப்பாடல் மாணவர்களுக்கு விஜய் அட்வைஸ் செய்வது போல் அமைந்துள்ளது. இந்த சிங்கிள் ட்ராக் லிரிக்ஸ் மற்றும் கார்ட்டூன் வீடியோவாக வெளியிடப்பட்டுள்ளது. இந்தப் பாடல் ஒய் திஸ் கொல வெறி பாடலில் இடம் பெற்றுள்ளதை போன்று ஏராளமான ஆங்கில வார்த்தைகள் இடம்பெற்றுள்ளன.

ஹேட்டர்ஸ்..

விஜய்க்கு எதிரே இருப்பவர்களுக்கு தலையில் காவி நிற கலர் கொடுக்கப்பட்டுள்ளது. குறிப்பாக Haters are gonna hate but ignore calmly என்ற வரி இடம் பெறும் இடத்தில் கார்ட்டூன் தலையில் காவியடிக்கப்பட்டுள்ளது. மேலும் டிசைன் டிசைனா பிராப்ளம்ஸ் வரும்.. கொஞ்சம் சில் பண்ணு மாப்பி என என்ற வரிகளும் இந்தப் பாடலில் இடம்பெற்றிருக்கிறது.

ஏழாம் பொருத்தம்

கார்ட்டூன்களின் தலையில் காவி அடிக்கப்பட்டிருப்பதை நெட்டிசன்கள் அரசியல் ரீதியாக பார்த்து வருகின்றனர். நடிகர் விஜய்க்கும் பாஜகவுக்கும் ஏழாம் பொருத்தமாக இருந்து வருகிறது. மெர்சல் படத்தின் போதும் பாஜகவும் விஜய்க்கும் இடையே மோதல் ஏற்பட்டது. பாஜகவின் விமர்சனங்களுக்கு ஆளானார் விஜய்.

வீடுகளில் ரெய்டு

சமீபத்தில் கூட வருமான வரித்துறை அதிகாரிகள் நெய்வேலி நிலக்கரி சுரங்கத்தில் படப்பிடில் இருந்த நடிகர் விஜயை நேரடியாக கையிலேயே சம்மன் கொடுத்த விசாரணை நடத்தினர். நடிகர் விஜய்க்கு சொந்தமான வீடுகளிலும் 2 நாட்கள் விடிய விடிய வருமான வரித்துறை அதிகாரிகள் ரெய்டு நடத்தினர்.

அதிகரிக்கும் விரிசல்

போதா குறைக்கு நெய்வேலியில் படப்பிடிப்பு நடத்த எதிர்ப்பு தெரிவித்து பாஜகவினர் போராட்டம் நடத்தினர். இந்த விஷயம் தமிழக திரைத்துறையிலும் அரசியல் வட்டாரத்திலும் பெரும் பரபரப்பை ஏற்படுத்தியது. இதனால் நடிகர் விஜய் தரப்புக்கும் பாஜகவுக்கும் இடையேயான விரிசல் அதிகரித்துள்ளது.

நேரடியாக தாக்கிய விஜய்

நடிகர் விஜயும் தன்னுடைய ரசிகர் பட்டாளத்தின் பலத்தை காட்ட படப்பிடின் இறுதி நாளில் பஸ் மீது ஏறி நின்று செல்பி எடுத்தார். அதனை தனது டிவிட்டர் பக்கத்திலும் வெளியிட்டார். அந்த போட்டோக்கள் பெரும் வைரலானது. இந்நிலையில் நடிகர் விஜய் இன்று வெளியான ஒரு குட்டி ஸ்டோரி பாடலின் பல வரிகளின் மூலம் பாஜகவை நேரடியாகவே தாக்கியிருக்கிறார்.