அட.. நம்ம யோகி பாபுவுக்கு கல்யாணமாமே.. யாரு பொண்ணு.. என்னைக்கு கல்யாணம்.. எங்க கல்யாணம்னு பாருங்க!

அடிக்கடி தகவல்

முன்னணி ஹீரோக்களின் கால்ஷீட் கூட கிடைத்து விடுகிறது. ஆனால் யோகி பாபுவின் கால்ஷீட் கிடைக்க வில்லை என புலம்பி வருகின்றனர் இயக்குநர்கள். இந்நிலையில் நடிகர் யோகி பாபுவுக்கு திருமணம் முடிவாகியுள்ளதாக தகவல் வெளியாகியுள்ளது. கடந்த சில மாதங்களாகவே யோகி பாபுவுக்கு திருமணம் என அடிக்கடி தகவல் பரவி வருகிறது.

நடிகர் விளக்கம்

அண்மையில் கூட துணை நடிகை ஒருவருடன் யோகி பாபு இருக்கும் போட்டோ வைரலானது. மேலும் யோகி பாபுவுக்கு இவ்ளோ அழகான மனைவியா என்று கேட்டு அந்த போட்டோவை நெட்டிசன்கள் ட்ரென்ட்டாக்கினர். ஆனால் போட்டோவில் இருக்கும் பெண்ணுக்கும் தனக்கும் எந்த சம்பந்தமும் இல்லை என்று யோகி பாபு விளக்கம் அளித்திருந்தார்.

விரைவில் திருமணம்

சம்பந்தப்பட்ட அந்த துணை நடிகையும் ஒரு படத்தின் போது யோகி பாபுவுடன் தான் அந்த செல்பியை எடுத்ததாக கூறினார். இந்நிலையில் தர்பார் வெளியீட்டு விழாவின் போது தனக்கு விரைவில் திருமணம் நடைபெறும் என நடிகர் ரஜினிகாந்த் கூறியிருக்கிறார் என்றார். இந்நிலையில் நடிகர் யோகி பாபுவுக்கு திருமணம் நிச்சயமாகியிருப்பதாக தகவல் வெளியாகியிருக்கிறது.

பார்கவி

இதனை நடிகர் யோகி பாபுவும் உறுதி செய்துள்ளார். இதுதொடர்பாக ஊடகம் ஒன்றிற்கு அளித்த பேட்டியில் பெற்றோர் பார்த்து நிச்சயித்த திருமணம் இது என கூறியுள்ளார். மேலும் பெண்ணின் பெயர் பார்கவி என்றும் கூறியிருக்கிறார். பார்கவி சாதாரண குடும்பத்தை சேர்ந்தவர் தான் என்று தனக்கும் குடும்பத்தினருக்கும் மிகவும் பெண்ணை பிடித்திருப்பதாகவும் யோகி பாபு தெரிவித்துள்ளார்.

திருத்தணியில் திருமணம்

யோகி பாபு தீவிர முருக பக்தர் என்பதால் இவர்களின் திருமணம் திருத்தணி முருகன் கோவிலில் நடைபெறவுள்ளதாகவும் கூறியுள்ளார். திருமணத்தில் குடும்பத்தினர் மற்றும் நெருங்கிய உறவினர்கள் மட்டுமே பங்கேற்பார்கள் என்று கூறப்படுகிறது. பிப்ரவரி 5ஆம் தேதி திருமணம் நடைபெறும் என்றும் தகவல் வெளியாகியிருக்கிறது.