ஸ்ருதி ஹாஸனுக்கும், எனக்கும் மோதலா?: பிரபுதேவா விளக்கம்

சென்னை: ஸ்ருதி ஹாஸனுக்கும், தனக்கும் இடையே எந்தவித பிரச்சனையும் இல்லை என்று இயக்குனர், நடிகர் பிரபுதேவா தெரிவித்துள்ளார்.

இது குறித்து அவர் செய்தியாளர்களிடம் கூறுகையில்,

திரைத்துறையில் ஒரு டான்சர் ஆவேன், நடிப்பேன், படத்தை இயக்குவேன் என்று ஒரு நாளும் நினைத்தது இல்லை. எல்லாமே எதிர்பாராமல் நடந்தது தான். ஒரு இயக்குனர் என்ற முறையில் படம் பார்க்க வருபவர்களை சந்தோஷப்படுத்துவது மிகவும் முக்கியம். என்னை பற்றி வரும் கிசுகிசுக்களை நான் கண்டுகொள்வதில்லை.

தோல்விகளில் இருந்து பாடம் கற்றுக் கொண்டுள்ளேன். திருமணத்தை பற்றி நினைக்க நேரம் இல்லை. நேரம் கிடைக்கையில் சென்னை வந்து குழந்தைகளை பார்க்கிறேன். இல்லை என்றால் அவர்களை மும்பைக்கு வர வழைக்கிறேன். அவர்களை பல்வேறு இடங்களுக்கு அழைத்துச் செல்கிறேன். அண்மையில் என் குழந்தைகள் ஆஸ்திரேலியாவில் மட்டுமே கிடைக்கும் ஒரு வகை பொம்மை வேண்டும் என்று கேட்டனர். உடனே அவர்களை ஆஸ்திரேலியாவுக்கு அழைத்துச் சென்று அந்த பொம்மையை வாங்கிக் கொடுத்தேன்.

ராமையா வஸ்தாவய்யா ஷூட்டிங்கின்போது எனக்கும், ஸ்ருதி ஹாஸனுக்கும் இடையே மோதல் ஏற்பட்டது என்ற செய்தி பரவியுள்ளது. அதில் சிறுதும் உண்மை இல்லை. எங்களுக்குள் எந்த பிரச்சனையும் இல்லை. ஸ்ருதி ஒரு நல்ல டான்சர் என்றார்.