'இளவரசர் கமல்'... - ஓவியர் ஸ்ரீதர் தந்த பரிசு!

கமல் ஹாஸனை ஓவியங்களாக வரைந்து தள்ளியவர் பிரபல ஓவியர் ஏ பி ஸ்ரீதர். சமீபத்தில் இவரது ஓவியக் கண்காட்சியை, போயஸ் கார்டனில் திறந்து வைத்ததோடு, அவரை தன் சகோதரர் என்று கூறி பெருமைப்படுத்தினார்.

கமலின் இந்த பெருந்தன்மைக்கு நன்றி தெரிவிக்கும் வகையில், இன்னொரு ஓவியத்தை வரைந்துள்ளார் ஸ்ரீதர்.

இதில் கமல்ஹாஸனின் தந்தை சீனிவாசனை மன்னரைப் போலவும், கமல் ஹாஸனை இளவரசர் மாதிரியும் சித்தரித்துள்ளார்.

"கமல் சார் எனக்கு கண்ணன் மாதிரி. நான் அவருக்கு குசேலன். என்னால் அவருக்கு தர முடிந்ததெல்லாம் இதுபோன்ற கலைப் பரிசுதான்," என்று ஸ்ரீதர் குறிப்பிட்டுள்ளார்.

சமீபத்தில் கமல்ஹாஸனைச் சந்தித்த ஸ்ரீதர் இந்த ஓவியத்தை அவருக்கு அளித்தபோது, மிகவும் மகிழ்ந்துபோனாராம் கமல்!

காதல் இளவரசன் என்ற பழைய பட்டப் பெயர் நினைவுக்கு வந்திருக்குமோ!