தீபாவளிக்கு இன்னும் ஒரு புது ரிலீஸ்... இது அனேகன் டீசர்!

பிரபல ஒளிப்பதிவாளர் கே.வி.ஆனந்த் இயக்கத்தில் தனுஷ் நடிக்கும் புதிய படம் அனேகன் டீசர், தீபாவளி தினத்தில் வெளியாகவிருக்கிறது.

இந்தப் படத்தில் அமிரா தஸ்தூர் என்ற புதுமுகம் தனுஷ் ஜோடியாக அறிமுகமாகிறார். கார்த்திக் இப்படத்தில் ஒரு முக்கிய கதாபாத்திரத்தில் நடிக்கிறார்.

ஹாரிஸ் ஜெயராஜ் இசையமைக்கும் இப்படத்தை ஏ.ஜி.எஸ்.நிறுவனம் பிரம்மாண்டமாக தயாரித்து வருகிறது. நீண்டகால தயாரிப்பில் இருக்கும் இப்படத்தின் டீசரை வரும் தீபாவளிக்கு வெளியிடப்போவதாக அறிவித்துள்ளனர். மேலும், தீபாவளிக்கு பிறகு ஆடியோ வெளியீட்டை நடத்தவும் திட்டமிட்டுள்ளனர்.

இப்படத்தில் தனுஷ் ஒரு பாடலை பாடியுள்ளார். இரண்டாம் உலகம் படத்திற்கு பிறகு ஹாரிஸ் ஜெயராஜ் இசையில் தனுஷ் பாடியுள்ள பாடல் இது.

தீபாவளிக்கு ஏற்கெனவே விஜய்யின் கத்தி, விஷாலின் பூஜை ஆகிய படங்கள் வெளிவருகின்றன. இத்துடன் அனேகன் டீசரும் வெளியாவது தனுஷ் ரசிகர்களை உற்சாகப்படுத்தியுள்ளது.