அஞ்சான் முதல் நாள் வசூல் 11.5 கோடி.. தயாரிப்பாளர் அறிவிப்பு!!

சூர்யா நடித்த அஞ்சான் படம் வெளியான முதல் நாளே ரூ 11.5 கோடியை அள்ளியுள்ளது.

லிங்குசாமி இயக்கத்தில் சூர்யா - சமந்தா ஜோடியாக நடித்துள்ள படம் அஞ்சான். மும்பை தாதாவாக வருகிறார் சூர்யா இந்தப் படத்தில்.

உலகம் முழுவதும் 1400 அரங்குகளில் இந்தப் படம் நேற்று வெளியானது. தமிழகத்தில் 450க்கும் அதிகமான அரங்குகளில் வெளியானது.

படம் குறித்து கலவையான விமர்சனங்கள் இருந்தாலும், இதுவரை சூர்யாவின் எந்தப் படத்துக்கும் கிடைக்காத ஆரம்ப வசூல் இந்தப் படத்துக்குக் கிடைத்துள்ளது.

முதல் நாளில் தமிழகம், ஆஸ்திரேலியா, பிரிட்டன், அமெரிக்கா, மலேசியா, சிங்கப்பூர் போன்ற நாடுகளில் ரசிகர்கள் படம் பார்க்க அலைமோதினர்.

முதல் நாளில் தமிழகத்தில் மட்டுமே ரூ 11.5 கோடி இந்தப் படத்துக்கு ஆரம்ப வசூலாகக் கிடைத்துள்ளது. சூர்யாவின் படங்களின் வசூலில் இது புதிய சாதனையாகும்.

ஆஸ்திரேலியாவில் நேற்று ஒரே நாளில் ரூ 22.82 லட்சத்தைக் குவித்துள்ளது இந்தப் படம்.

பிரிட்டனில் ரூ 41.59 லட்சத்தை வசூலாகக் குவித்துள்ளது அஞ்சான். அங்கு இன்னும் பத்து அரங்குகளின் வசூல் நிலவரம் வெளிவரவேண்டியுள்ளது குறிப்பிடத்தக்கது.