அபர்ணா பாலமுரளியிடம் அத்துமீறிய கல்லூரி மாணவர்.. டிரெண்டாகும் வீடியோ.. ஷாக்கான ரசிகர்கள்!

சூரரைப் போற்று பொம்மி

ஒரு செகண்ட் கிளாஸ் யாத்ரா படம் மூலம் கடந்த 2015ல் மலையாளத்தில் அறிமுகமானவர் நடிகை அபர்ணா பாலமுரளி. தமிழில் 8 தோட்டாக்கள் படத்தின் மூலம் அறிமுகமான இவர் நடிகர் சூர்யாவுக்கு ஜோடியாக சூரரைப் போற்று படத்தில் பொம்மி கதாபாத்திரத்தில் நடித்து ரசிகர்கள் மனதில் மிகப்பெரிய இடத்தை பிடித்துள்ளார். கடந்த ஆண்டு ஆர்ஜே பாலாஜியுடன் வீட்ல விசேஷம் மற்றும் அசோக் செல்வன் உடன் நித்தம் ஒரு வானம் உள்ளிட்ட தமிழ் படங்களில் நடித்திருந்தார்.

தங்கம்

சுந்தரி கார்டன்ஸ், இனி உதாரம், காப்பா உள்ளிட்ட மலையாள படங்களிலும் கடந்த ஆண்டு நடித்து கலக்கி இருந்தார் அபர்ணா பாலமுரளி. விரைவில் அவர் நடித்துள்ள மற்றொரு மலையாள திரைப்படமான தங்கம் வெளியாகிறது. சாஹித் அராஃபத் இயக்கத்தில் வினீத் ஸ்ரீனிவாசன், பிஜு மேனன் உடன் இந்த படத்தில் நடித்துள்ளார் அபர்ணா பாலமுரளி.

கல்லூரி விழா

கேரளாவில் சமீபத்தில் நடைபெற்ற கல்லூரி விழாவில் தங்கம் படக்குழுவினர் கலந்து கொண்டு படத்தை ப்ரோமோட் செய்தனர். அப்போது சட்டக் கல்லூரி மாணவர் ஒருவர் நடிகை அபர்ணா பாலமுரளியிடம் அத்துமீறி நடந்து கொண்ட வீடியோ சமூக வலைதளங்களில் தீயாய் பரவி வருகிறது.

அத்துமீறிய மாணவர்

நடிகை அபர்ணா பாலமுரளியை வரவேற்கும் விதமாக மேடையில் ஏறிய அந்த மாணவர் நடிகையின் அனுமதி இல்லாமல் திடீரென அவரது தோளில் கை போட்டது பெரும் பரபரப்பை கிளப்பியது. அபர்ணா பாலமுரளிக்கு அது கொஞ்சம் கூட பிடிக்காத நிலையில், அங்கிருந்து விலகிச் சென்ற காட்சிகள் ரசிகர்களை அதிர்ச்சியில் ஆழ்த்தி உள்ளன.

ரசிகர்கள் கண்டனம்

எந்த பெண்ணாக இருந்தாலும் அவர் அனுமதி இல்லாமல் நெருங்கவோ தொடவோ கூடாது. இந்நிலையில், கொஞ்சம் கூட அறிவு இல்லாமல் நடிகை அபர்ணா பாலமுரளியிடம் அந்த கல்லூரி மாணவர் எப்படி அத்துமீறி நடக்கலாம் என அந்த கல்லூரியையும் அந்த கல்லூரி மாணவரையும் ரசிகர்கள் திட்டித் தீர்த்து வருகின்றனர்.