அருண்பாண்டியன் தயாரிக்கும் சவாலே சமாளி! - சுவிஸ்ஸில் படப்பிடிப்பு

அய்ங்கரன் நிறுவனத்திலிருந்து விலகிய பிறகு, அருண்பாண்டியன் தனியாக தொடங்கிய ஏபி குரூப்ஸ் சார்பில் தயாரிக்கும் புதிய படம் சவாலே சமாளி.

கவிதாபாண்டியன், எஸ் என் ராஜராஜன் தயாரிக்கும் இந்தப் படத்துக்கு 'சவாலே சமாளி' என்று பெயரிட்டுள்ளனர்.

நடிகர்திலகம் சிவாஜி கணேசன் நடித்து மாபெரும் வெற்றி பெற்ற படம் சவாலே சமாளி. அந்த தலைப்பு இந்த கதைக்கு மிகவும் பொருத்தமாக இருந்ததால் இப்பெயர் சூட்டியதாக தெரிவிக்கிறார் இயக்குனர் சத்யசிவா.

சூது கவ்வும், தெகிடி வெற்றிப் படங்களில் நடித்த அசோக் செல்வன் கதாநாயகனாக நடிக்கிறார். பிந்து மாதவி கதாநாயகியாக நடிக்கிறார். முக்கிய வேடத்தில் ஜெகன் நடிக்கிறார்.

எஸ்எஸ் தமன் இசையமைக்கிறார். கதை, திரைக்கதை, வசனம் எழுதி இயக்குகிறார் சத்யசிவா. "கழுகு " வெற்றிப் படத்தைத் தொடர்ந்து இவர் இயக்கும் படம் இந்த சவாலே சமாளி.

படம் பற்றி கூறும் போது, "கழுகு, படத்திலிருந்து மாறுபட்டு இந்த படத்தை உருவாக்க நினைத்தேன். அதனால் முழுக்க முழுக்க காமெடி படமாக இதை உருவாக்கி உள்ளோம். படித்த இரண்டு இளைஞர்கள் வாழ்வில் முன்னேற சந்திக்கும் சவால்கள்தான் சவாலே சமாளி" என்றார்.