முகப்பு

செய்திகள்

இயக்குநர் பாரதிராஜாவின் தம்பி ஜெயராஜ் முக்கிய வேடத்தில் நடிக்கும் படத்துக்கு மூச் என்று தலைப்பிட்டுள்ளனர். இந்தப் படத்தில் டாக்டர் வேடத்தில் நடிக்கிறார் ஜெயராஜ்.

பாரதிராஜாவிடம் இணை இயக்குனராக பணியாற்றிய வினுபாரதி இந்தப் படத்தை இயக்குகிறார்.

நிதின் - நிஷா கோஷல் ஜோடியாக நடிக்கும் இந்தப் படத்தில் அபி - பியா எனும் இரு குழந்தைகள் முக்கிய வேடத்தில் நடிக்கின்றனர்.

நடிகராக ஜெயராஜுக்கு இது இரண்டாவது படம். ஏற்கெனவே கத்துக்குட்டி என்ற படத்தில் நடித்து வருகிறார் ஜெயராஜ். மூச் படத்தில் மனோதத்துவ டாக்டராக அவர் வருகிறார்.

திகில் படமாக உருவாகி வரும் மூச் பற்றி இயக்குனர் கூறுகையில், "இரு குழந்தைகளை மூச்சாக எண்ணி உரிமை கொண்டாடும் ஒரு தாய்க்கும்-பேய்க்கும் இடையே திகிலோடு நிகழும் பாசப்போராட்டமே 'மூச்'.

திரில்லர் படமாக இருந்தாலும் சிறியவர்கள் முதல் பெரியவர்கள் வரை அனைவரும் ரசிக்கும்படி இருக்கும். நகைச்சுவையும் படத்தில் இருக்கும். இதன் படப்பிடிப்பு குன்னூர் மற்றும் கிருஷ்ணகிரி மாவட்டம் காந்திக்குப்பம் என்ற இடத்திலும், சென்னையிலும் மொத்தம் 50 நாட்கள் படமாக்கியுள்ளோம்.

தற்போது படத்தின் இறுதிக்கட்ட பணிகள் நடைபெற்று வருகின்றன. செப்டம்பர் மாதத்தில் வெளியிட முடிவு செய்துள்ளோம்," என்றார்.

இப்படத்திற்கு நிதின் கார்த்திக் என்பவர் இசையமைக்கிறார். வெங்கடேஷ் ஒளிப்பதிவு செய்கிறார். பி புரொடக்ஷன்ஸ் சார்பாக பூபாலன் தயாரித்துள்ளார்.