பிகில் அப்டேட்: செப்டம்பரில் இசை வெளியீடு - தடபுடல் ஏற்பாடு தயார்

பிகில்

சமீப காலமாக பெண்கள் விளையாட்டுத் துறையில் அதிகம் சாதித்து வருகின்றனர். கடந்த வாரம் வெளியான கென்னடி கிளப் படம் பெண்கள் கபடியை மையமாக வைத்து எடுக்கப்பட்டது. அதேபோல் பெண் ரசிகர்களை கவரும் வகையில் தற்போது பிகில் படமும் பெண்கள் கால்பந்து விளையாட்டை மையப்படுத்தி எடுக்கப்பட்டு வருகிறது.

சிங்கப்பெண்ணே

ஏ.ஆர்.ரஹ்மான் இசையமைப்பில் சிங்கபெண்ணே பாடல் படு ஹிட்டாகி உள்ளது. இப்பாடலை இதுவரையிலும் 1.35 கோடி பேர் யூடியூபில் பார்த்து ரசித்துள்ளனர். இப்படம் தீபாவளிக்கு வெளியாகும் என ஏற்கனவே அறிவிக்கப்பட்டுள்ளது. இந்நிலையில் படத்தின் இசை வெளியீட்டு விழாவிற்கான ஏற்பாடுகள் பிரமாண்டமாகவும், வேகமாகவும் நடைபெற்று கொண்டிருக்கிறது.

செப்டம்பரில் இசை ரிலீஸ்

இசை வெளியீட்டு விழாவை நடத்துவதற்காக, செப்டம்பர் மாதம் 15ஆம் தேதி அல்லது 22ஆம் தேதி என இரண்டு நாட்கள் தேர்ந்தெடுக்கப்பட்டுள்ளது.
இதில் ஒரு தேதியை முடிவு செய்து விரைவில் அறிவிக்கப்படும் என பட குழுவினர் தெரிவித்துள்ளனர். இசை வெளியாவதற்கு முன்னரே யூடியூபில் சாதனை படைத்துள்ளதால் விஜய் ரசிகர் மத்தியில் இப்படத்தின் இசையை எதிர்பார்த்து காத்துக்கொண்டிருக்கின்றனர்.

விஜய் நயன்தாரா ஜோடி

பிகில் படத்தை ஏ.ஜி.எஸ்.கல்பாத்தி அகோரம் தயாரிக்கிறார். ஜி.கே.விஷ்ணு ஒளிப்பதிவு செய்கிறார். விஜய் ஜோடியாக நயன்தாரா நடித்திருக்கிறார். இவர்களைத் தவிர விவேக், கதிர், தேவதர்ஷினி, ஜாக்கி ஷெராப், டேனியல் பாலாஜி ஆகியோர் இப்படத்தில் முக்கிய கதாபாத்திரத்தில் நடிக்கின்றனர்.