சிறந்த துணை நடிகருக்கான தேசிய விருதை வென்ற விஜய் சேதுபதி.. படப்பிடிப்பில் கேக் வெட்டி கொண்டாட்டம்!

சிறந்த துணை நடிகர்

சிறந்த நடிகருக்கான விருதுக்கு நடிகர் தனுஷும், சிறந்த துணை நடிகருக்கான விருதுக்கு நடிகர் விஜய்சேதுபதியும் அறிவிக்கப்பட்டுள்ளனர். நடிகர் தனுஷ் அசுரன் படத்திற்காகவும் நடிகர் விஜய் சேதுபதி சூப்பர் டீலக்ஸ் படத்திற்காகவும் தேசிய விருதுக்கு தேர்வாகியுள்ளனர்.

ஷில்பா கேரக்டர்

சூப்பர் டீலக்ஸ் படத்தில் விஜய் சேதுபதி ஷில்பா என்ற கதாப்பாத்திரத்தில் நடித்திருந்தார். இந்த கதாப்பாத்திரத்திற்காக தான் தேசிய விருதுக்கு தேர்வாகியிருக்கிறார் விஜய் சேதுபதி. விருது அறிவிக்கப்பட்டவுடன் அப்படத்தின் இயக்குநரான தியாகராஜன் குமாரராஜாவுக்கு விஜய் சேதுபதி டிவிட்டரில் நன்றி கூறியுள்ளார்.

கேக் வெட்டி கொண்டாட்டம்

தேசிய விருது பெற்றுள்ள பிரபலங்களுக்கு சக திரைத்துறை நட்சத்திரங்கள் வாழ்த்து தெரிவித்து வருகின்றனர். இந்நிலையில் நடிகர் விஜய் சேதுபதி படப்பிடிப்பு தளத்தில் கேக் வெட்டி கொண்டாடியுள்ளார்.

வைரலாகும் வீடியோ

விஜய் சேதுபதி சன் பிக்சர்ஸ் தயாரிப்பில் உருவாகும் தனது 46வது படத்தில் நடித்து வருகிறார். படப்பிடிப்பில் இருந்த விஜய் சேதுபதி கேக் வெட்டி கொண்டாடியுள்ளார். அந்த வீடியோ சமூக வலைதளங்களில் வைரலாகி வருகிறது. இதனிடையே விஜய் சேதுபதி தனக்கு வாழ்த்து தெரிவித்த அத்தனை பிரபலங்களின் டிவிட்டுகளையும் ரீடிவிட் செய்துள்ளார்.