நானும் திரைப்படத்தில் நடித்துள்ளேன்.. சிஐஐ மாநாட்டை தொடங்கி வைத்து முதல்வர் ஸ்டாலின் பேச்சு!

சிஐஐ மாநாடு

தென்னிந்திய ஊடகம் மற்றும் பொழுதுபோக்கு துறையின், மிகப்பெரும் கருத்தரங்கு நந்தம்பாக்கத்தில் ஏப்ரல் 9 மற்றும் 10ம் ஆகிய இருநாட்களில் நடைபெறுகிறது. இதனை முதலமைச்சர் மு.க.ஸ்டாலின் தற்போது தொடங்கி வைத்து சிறப்புரை ஆற்றினார். இந்த விழாவில் இயக்குநர் ராஜமெளலி, மணிரத்னம், ஜெயம் ரவி உள்ளிட்ட பல பிரபலங்கள் பங்கேற்றுள்ளனர்.

முதலமைச்சர் பேச்சு

மாநாட்டை துவங்கி வைத்து பேசிய முதலமைச்சர் மு.க. ஸ்டாலின், "நானும் திரைப்படத்தில் சிறு வேடங்களில் நடித்துள்ளேன். திரைத்துறையுடன் எனக்கு நெருங்கிய தொடர்பு உள்ளதால் ஆர்வத்துடன் பங்கேற்றுள்ளேன் என சிஐஐ மாநாட்டை தொடங்கி வைத்து முதலமைச்சர் ஸ்டாலின் பேசியுள்ளார்.

டிஜி தியாகராஜன்

சத்யஜோதி பிலிம்ஸ் நிறுவனர், தக்‌ஷின் மீடியா மற்றும் பொழுதுபோக்கு உச்சி மாநாட்டின் தலைவர் மற்றும் நிர்வாகப் பங்குதாரர் டி.ஜி. தியாகராஜன் இந்த நிகழ்ச்சிக்கு தலைமை ஏற்று நடத்தி வருகிறார். இந்த மாநாட்டை வழிநடத்தும் குழு உறுப்பினர்களான சுஹாசினி மணிரத்னம், குஷ்பு சுந்தர், சுஜாதா விஜயகுமார், லிஸ்ஸி லட்சுமி, ஜி.தனஞ்செயன் உள்ளிட்ட பிரபலங்கள் இந்த விழாவில் பங்கேற்றுள்ளனர்.

ஏ.ஆர். ரஹ்மானுக்கு விருது

இந்த விழாவில் இசையமைப்பாளர் ஏ.ஆர்.ரஹ்மானுக்கு சிறந்த ஐகான் விருது வழங்கப்படுகிறது. இயக்குநர் மணிரத்னம், இயக்குநர் ராஜமெளலி மற்றும் நடிகர் ஜெயம் ரவி உள்ளிட்ட திரைத்துறையை சேர்ந்த பல முக்கிய பிரபலங்கள் இந்த மாநாட்டில் கலந்து கொண்டு உரையாற்ற உள்ளனர். தென்னிந்திய சினிமாவின் வளர்ச்சிக்கு இந்த மாநாடு உறுதுணையாக இருக்கும் என கூறப்படுகிறது.